Netflix-ը բանակցություններ է սկսել Warner Bros. Discovery հետ՝ բիզնեսի մի մասը գնելու վերաբերյալ. Bloomberg

Սա Netflix-ի առաջին նման մասշտաբի գործարքը կլինի:

Ամերիկյան Netflix սթրիմինգային ծառայությունը բանակցություններ է սկսել Warner Bros. Discovery մեդիա կոնգլոմերատի հետ՝ իր կինո- եւ հեռուստատեսային ստուդիաները, ինչպես նաեւ HBO Max սթրիմինգային հարթակը ձեռք բերելու համար: Գործարքը կարող է «տեկտոնական տեղաշարժեր» առաջացնել ԱՄՆ մեդիա բիզնեսում, հաղորդել է Bloomberg-ը՝ հղում կատարելով աղբյուրներին:

Ընկերությունները կարող են հայտարարել գործարքի մասին առաջիկա օրերին: Եթե կարգավորող մարմինները արգելափակեն գործարքը, Netflix-ը կվճարի 5 միլիարդ դոլարի տուգանք: Warner Bros. մալուխային հեռուստաալիքները՝ CNN, TBS եւ TNT-ն, չեն մասնակցի գործարքին. դրանք կմիավորվեն առանձին ընկերության մեջ, պարզաբանել է գործակալությունը: «Եթե գործարքը կնքվի, այն կհանգեցնի տեկտոնական տեղաշարժի զվարճանքի ոլորտում՝ միավորելով աշխարհի ամենամեծ վճարովի սթրիմինգային ծառայությունը Հոլիվուդի ամենահին եւ ամենահարգված ստուդիաներից մեկի հետ»,- գրել է գործակալությունը:

Նշվել է, որ սա Netflix-ի առաջին նման մասշտաբի գործարքը կլինի: Ընկերությունը ոչ միայն հասանելիություն կստանա HBO-ի անմիջական մրցակցի կոնտենտին, այդ թվում՝ «Սոպրանոների կլանը» եւ «Գահերի խաղը» սերիալներին, այլեւ Warner Bros.-ի գրադարանին, այդ թվում՝ «Հարի Փոթեր» ֆրանշիզային եւ «Ընկերներ» սերիալներին:

Warner Bros. Discovery-ի հետ գործարքի այլ հավակնորդների թվում էին Comcast-ը եւ Paramount Skydance-ը: Վերջինի համար Netflix-ի հաղթանակը հարված կլիներ, նշել է գործակալությունը: Paramount Skydance-ի ղեկավարությունն առաջարկել է ամենահավակնոտ պայմանները՝ այն պատրաստ էր ձեռք բերել Warner Bros. Discovery-ի ամբողջ բիզնեսը՝ վճարելով բացառապես արտարժույթով, այսինքն՝ առանց պարտքի կամ այլ ֆինանսական գործիքների օգտագործման։

Warner Bros. Discovery-ի վաճառքը տեղի է ունենում մեդիա բիզնեսում ընթացող փոփոխությունների ֆոնին: Սպառողներն ավելի ու ավելի քիչ են դիտում մալուխային հեռուստատեսություն: Գործակալությունը գրել է, որ երրորդ եռամսյակում Warner Bros.-ի եկամուտները նվազել են 23 տոկոսով, քանի որ հաճախորդները չեղարկել են բաժանորդագրությունները եւ փնտրել են ժամանցային կոնտենտի այլընտրանքային աղբյուրներ: Եթե բանակցությունները հաջող լինեն, Netflix-ի կողմից վերահսկվող սթրիմինգային ծառայությունների բաժանորդների ընդհանուր թիվը կհասնի 450 միլիոնի, ինչը կարող է գրավել հակամենաշնորհային մարմինների ուշադրությունը: