Nestlé-ն համաշխարհային մակարդակով հետ է կանչում NAN մանկական կաթնախառնուրդների որոշ խմբաքանակներ

Տեսչական մարմնի տեղեկացմամբ՝ նշված տոքսինը կարող է առաջացնել սրտխառնոց, փսխում և ստամոքսի ցավեր։

Nestlé ընկերությունը համաշխարհային մակարդակով հետ է կանչել NAN ապրանքանիշի մանկական կաթնախառնուրդների որոշ խմբաքանակներ՝ ցերևիլիդ տոքսինով հնարավոր աղտոտման ռիսկի պատճառով։ Այս մասին հայտնում են ՀՀ սննդամթերքի անվտանգության տեսչական մարմնից։

Տեսչական մարմնի տեղեկացմամբ՝ նշված տոքսինը կարող է առաջացնել սրտխառնոց, փսխում և ստամոքսի ցավեր։ Թեև տվյալ արտադրանքի օգտագործման հետ կապված հիվանդության հաստատված դեպքեր չեն արձանագրվել, հետկանչը իրականացվում է նախազգուշական նպատակով։

Սննդամթերքի անվտանգության տեսչական մարմնի պահանջով՝ NAN ապրանքանիշի նշված խմբաքանակները Հայաստանի Հանրապետություն ներմուծող ընկերությունները սկսել են հետկանչի գործընթացը՝ հավաքելով ապրանքը իրացման կետերից։

Տեսչական մարմինը տեղեկացնում է, որ նշված խմբաքանակների արտադրանքը հայտնաբերելու դեպքում քաղաքացիները պետք է ձեռնպահ մնան դրանց ձեռքբերումից և անմիջապես տեղեկացնեն Տեսչական մարմնին 118 թեժ գծի հեռախոսահամարով, որը գործում է շուրջօրյա և անվճար։