Նապոլեոն III-ի կնոջ թագը գրեթե անվնաս է և կարող է վերականգնվել

Կողոպուտի հետևանքով թագից բացակայում է ութ ոսկե արծիվներից մեկը։

Լուվրի թանգարանը հայտնել է, որ Նապոլեոն III-ի կնոջ՝ ֆրանսիական կայսրուհի Եվգենիայի թագը, որը վնասվել էր 2025 թվականի հոկտեմբերին թանգարանում տեղի ունեցած կողոպուտի ընթացքում, գտնվում է գրեթե անվնաս վիճակում և կարող է լիովին վերականգնվել։ Այդ մասին հաղորդում է BBC-ն։

Թանգարանի տեղեկացմամբ՝ վերականգնման աշխատանքների վերահսկման նպատակով ձևավորվել է փորձագիտական հանձնաժողով, որը գլխավորում է Լուվրի նախագահ Լորենս դե Կարը։

Կողոպուտի հետևանքով թագից բացակայում է ութ ոսկե արծիվներից մեկը։ Միևնույն ժամանակ պահպանվել են թագի 56 զմրուխտները և 1354 ադամանդներից գրեթե բոլորը՝ բացի 10-ից։

Լուվրը հրապարակել է թագի առաջին լուսանկարները կողոպուտից հետո։ Թանգարանի հաղորդմամբ՝ թագը «խիստ դեֆորմացված» է դարձել այն պատճառով, որ գողերը փորձել են այն հանել ապակե ցուցափեղկից բացված նեղ անցքով։

Թանգարանում ընդգծել են, որ առկա վնասվածքները տեխնիկապես հնարավոր է վերացնել՝ պահպանելով պատմական արժեքի ամբողջականությունը։