Թանգարանների աշխատողների ատեստավորումը կուղեկցվի աշխատավարձերի աճով

Վերջին շրջանում թանգարանները ավելացրել են սեփական եկամուտները։

ԿԳՄՍ նախարարությունը քննարկում է պետական թանգարանային աշխատողների ատեստավորման համակարգի բարեփոխումները։

Քննարկման ընթացքում նախարար Ժաննա Անդրեասյանը նշել է, որ ատեստավորման մեխանիզմը նախատեսվում է որպես մասնագիտական զարգացման և վարձատրության բարձրացման փոխկապակցված համակարգ։

Նախարարության տվյալներով՝ համակարգի ներդրմամբ նախատեսվում է միջինում շուրջ 60% աշխատավարձի բարձրացում ոլորտում աշխատող մասնագետների համար։

Ատեստավորման գործընթացը կներառի երկու փուլ՝ գրավոր թեստ և հարցազրույց, և նախատեսված է թանգարանների կառավարչական, գիտահետազոտական և ցուցադրական գործունեություն իրականացնող աշխատակիցների համար։

Առաջարկվող փոփոխություններով նախատեսվում է ատեստավորման կազմակերպումը վերապահել հենց թանգարաններին՝ ապահովելով ավելի ճկուն և մասնագիտական գնահատման մեխանիզմներ։

Միաժամանակ նախատեսվում է հստակեցնել հավելավճարների հաշվարկման կարգը՝ ապահովելով միասնական և կանխատեսելի կիրառություն։

Նախարարության գնահատմամբ՝ մեկ տարվա ընթացքում ոլորտին կուղղվի ավելի քան 500 մլն դրամ լրացուցիչ ֆինանսավորում՝ աշխատավարձերի բարձրացման ապահովման նպատակով։

Նշվում է նաև, որ վերջին շրջանում թանգարանները ավելացրել են սեփական եկամուտները, և նախատեսվում է զարգացնել արտաբյուջետային միջոցների օգտագործման մեխանիզմները՝ ուղղելով դրանք ցուցադրությունների, հավաքածուների համալրման և այլ ծրագրերի իրականացմանը։

Բարեփոխումները նպատակ ունեն բարձրացնել ոլորտի արդյունավետությունը և մասնագիտական կարողությունների զարգացումը։