Կապիկի ծաղիկի բռնկումը այլևս չի համարվում միջազգային նշանակության առողջապահական արտակարգ իրավիճակ․ ԱՀԿ

Կապիկի ծաղիկի բռնկումը այլևս չի համարվում միջազգային նշանակության առողջապահական արտակարգ իրավիճակ․ ԱՀԿ

Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը հայտարարել է, որ կապիկի ծաղիկի բռնկումը այլևս չի համարվում միջազգային նշանակություն ունեցող հանրային առողջության արտակարգ իրավիճակ։

Ինչպես փոխանցում է «Արմենպրես»-ը՝ վկայակոչելով ՏԱՍՍ-ը, Գեբրեյեսուսի խոսքով՝ արտակարգ ռեժիմը հայտարարվել էր ավելի քան մեկ տարի առաջ՝ ԱՀԿ-ի արտակարգ հանձնաժողովի առաջարկությամբ։ Այդ հանձնաժողովը դրանից հետո յուրաքանչյուր երեք ամիսը մեկ հավաքվել է՝ գնահատելու իրավիճակի զարգացումները։

«Երեկ հանձնաժողովը անցկացրեց հերթական նիստը և ինձ տեղեկացրեց, որ իր կարծիքով իրավիճակն այլևս չի ներկայացնում միջազգային նշանակություն ունեցող առողջապահական արտակարգ իրավիճակ։ Ես ընդունեցի այդ առաջարկությունը»,– նշել է ԱՀԿ ղեկավարը Ժնևում կայացած ճեպազրույցում։

Նա ընդգծել է, որ որոշումը պայմանավորված է հիվանդացության և մահացության դեպքերի կայուն նվազմամբ մի շարք տուժած երկրներում, սակայն հավելել է, որ սա չի նշանակում՝ սպառնալիքն ամբողջությամբ վերացել է։ ԱՀԿ-ն շարունակելու է քայլեր ձեռնարկել կապիկի ծաղիկի տարածումը կանխելու համար։