Երկուշաբթի օրը Լուվրը չի բացվել՝ աշխատակիցների անժամկետ գործադուլի պատճառով․ AFP

Գործադուլին այս պահին մասնակցում է 400 մարդ։

Փարիզի Լուվրի թանգարանը երկուշաբթի օրը չի բացվել մշակութային հաստատության աշխատակիցների կողմից հայտարարված անժամկետ գործադուլի պատճառով, երկուշաբթի օրը հաղորդել է Agence France-Presse-ը։

BFMTV հեռուստաալիքը դեկտեմբերի 10-ին հայտնել է, որ ամենայն հավանականությամբ թանգարանը երկուշաբթի օրը կարող է փակել իր դռները այցելուների համար՝ աշխատակիցների գործադուլի մեկնարկի պատճառով։ Ավելի վաղ ֆրանսիական երեք արհմիություններ, այդ թվում՝ առաջատար «Աշխատանքի համընդհանուր համադաշնությունը» (CGT), Լուվրի աշխատակիցներին կոչ էին արել դեկտեմբերի 15-ից անժամկետ գործադուլ սկսել։ Նրանք դժգոհ են աշխատանքային պայմանների վատթարացումից և ռեսուրսների պակասից։

«Թանգարանի բացումն այս պահին հետաձգված է։ Հնարավոր բացման մասին մանրամասների վերաբերյալ կտեղեկացնենք առաջին իսկ հնարավորության դեպքում», - «AFP» գործակալությունը մեջբերում է տեղեկատվական հայտարարության տեքստը, որը թանգարանի աշխատակիցները փակցրել են Լուվրի մուտքի մոտ՝ տեղական ժամանակով ժամը 09.00-ին:

Պարբերականի տվյալներով՝ գործադուլին այս պահին մասնակցում է 400 մարդ։

Նոյեմբերին Լուվրը մի շարք վթարների է բախվել՝ ներքին կոնստրուկցիաների և ջրային հաղորդակցուղիների անբավարար վիճակի պատճառով։ Ամսվա կեսերին թանգարանը հայտնել է իր սրահներից մեկի փակման մասին՝ միջհարկային ծածկերի փխրունության պատճառով։ Բացի այդ, նոյեմբերի վերջին հին խողովակների արտահոսքի հետևանքով Լուվրի գրադարանը հեղեղվել է կեղտաջրերով, ինչի պատճառով վնասվել է 300-ից 400 փաստաթուղթ։