Մոլդովայի խորհրդարանը սեպտեմբերի 22-ին հաստատել է էներգետիկ և հիդրոլոգիական ոլորտներում 60 օր ժամկետով արտակարգ դրություն սահմանելու մասին որոշումը, որը կգործի սեպտեմբերի 26-ից, հաղորդում է Newsmaker-ը։
Քվեարկությունը. Որոշման օգտին քվեարկել են իշխող PAS կուսակցության 54 պատգամավորներ, 20-ը դեմ են արտահայտվել, իսկ 22-ը՝ ձեռնպահ։
Պատճառները. Վարչապետ Վասիլե Տոֆանի խոսքով՝ քայլը պայմանավորված է գազի և նավթամթերքի գների աճով, դիզելային վառելիքի մատակարարման խափանումների ռիսկերով, ջրային ռեսուրսների սուր պակասով և Ուկրաինայում պատերազմով պայմանավորված տարածաշրջանային անկայունությամբ։
Արտակարգ ռեժիմի նպատակը. Իշխանությունները շեշտում են, որ ներկայումս ռեսուրսների պակաս չկա, իսկ քայլն ունի կանխարգելիչ բնույթ։ Այն կառավարությանը լրացուցիչ լծակներ է տալիս՝ արագ գնելու սարքավորումներ, տեղադրելու գեներատորներ և ծայրահեղ իրավիճակներում կիրառելու ժամանակավոր կարգավորումներ։
Ձմեռային կանխատեսումները. Մոտեցող ձմռանը Մոլդովայի էլեկտրաէներգիայի պահանջարկի մոտ 59%-ը նախատեսվում է ծածկել ներմուծման հաշվին, իսկ պիկ ժամերին ներմուծման պահանջարկը կարող է հասնել 400–450 ՄՎտ-ի։
Ինչու է դա կարևոր Փոխկապակցված ռիսկերը (գազ, էլեկտրաէներգիա, ջուր) և տարածաշրջանային պատերազմի ազդեցությունը ստիպում են Մոլդովային նախապես անցնել արտակարգ կառավարման ռեժիմի, որպեսզի ապահովվի երկրի էներգետիկ ու ջրային համակարգերի անխափան աշխատանքը ձմեռային շրջանում։
