ՀՀ պաշտպանության նախարարությանն այս տարի լրացուցիչ 4,3 մլն դրամ կտրամադրվի

Միջոցներն ուղղվելու են տվյալ բնագավառում իրականացվող քաղաքականությանը։

Կառավարությունն իր այսօրվա՝ նոյեմբերի 6–ի նիստում որոշում կայացրեց, որով Պաշտպանության նախարարությանն այս տարի լրացուցիչ կտրամադրվի 4 370 636 դրամ:

Որոշման հիմնավորման մեջ նշվում է, որ ՀՀ պաշտպանության նախարարության կողմից կապիտալ ծախսերի գծով այս տարի ստանձնած պայմանագրային մի շարք պարտավորությունների կատարման համար (այս տեղեկատվությունը նախագծում ներկայացված է որպես հույժ գաղտնի) ՀՀ ազգային անվտանգության ծառայության միջոցներից նախարարության կողմից իրականացվող 1169 ծրագրի 31001 միջոցառմանն ուղղել 4 370 636 դրամ լրացուցիչ գումար։

«Միջոցներն ուղղվելու են տվյալ բնագավառում իրականացվող քաղաքականությանը` Հայաստանի Հանրապետության պաշտպանության, անվտանգության, տարածքային ամբողջականության և սահմանների անձեռնմխելիության ապահովման համար»,– ասված է որոշման հիմնավորման մեջ:

Նշվում է նաև, որ որոշման ընդունումը ՀՀ 2025 թ. պետական բյուջեի տարեկան եկամուտների և ծախսերի փոփոխությունների չի հանգեցնում: