Միքելանջելոյի նախկինում չփաստաթղթավորված էսքիզը Christie's աճուրդում վաճառվել է 27.2 մլն դոլարով

Էսքիզը ներկայացված էր Christie's-ի «Հին վարպետների նկարներ և բրիտանական նկարներ» աճուրդի շրջանակում

Միքելանջելոյի նախկինում անհայտ նկարը Christie's աճուրդում վաճառվել է 27.2 միլիոն դոլարով, ինչը շուրջ քսան անգամ գերազանցում է դրա մեկնարկային գինը և սահմանում է նկարչի աշխատանքների աճուրդային նոր ռեկորդ։ Այդ մասին հայտնում է Christie's աճուրդի տան մամուլի ծառայությունը։

Նախորդ ռեկորդը Միքելանջելոյի աշխատանքների համար սահմանվել էր 2022 թվականին՝ 24.3 միլիոն դոլարի մակարդակում։

Christie's-ի փոխանցմամբ՝ նկարի սեփականատերը աշխատանքը նախնական գնահատման նպատակով ներկայացրել էր աճուրդի տան առցանց հարթակի միջոցով։ Աճուրդի տան մասնագետների կողմից իրականացված ուսումնասիրության արդյունքում աշխատանքը նույնականացվել է որպես Վատիկանի Սիքստինյան կապելլայի առաստաղի որմնանկարի գլխավոր կերպարներից մեկի՝ Լիբիական սիբիլլայի աջ ոտքի էսքիզ։

Կարմիր կավիճով կատարված էսքիզը թվագրվում է 1511–1512 թվականներին, այն ժամանակաշրջանին, երբ Միքելանջելոն աշխատում էր Սիքստինյան կապելլայի առաստաղի երկրորդ հատվածի վրա։

Christie's-ը նշում է, որ տվյալ աշխատանքը Սիքստինյան կապելլայի որմնանկարների համար նախկինում չփաստաթղթավորված միակ էսքիզն է, որը երբևէ ներկայացվել է աճուրդի։ Այն նաև Միքելանջելոյի շուրջ 10 հայտնի գծանկարներից մեկն է, որոնք ներկայումս գտնվում են մասնավոր հավաքածուներում։

Էսքիզը ներկայացված էր Christie's-ի «Հին վարպետների նկարներ և բրիտանական նկարներ» աճուրդի շրջանակում, որը ներառում էր նաև Ռեմբրանդտի, Տիցիանի և Ուիլյամ Բլեյքի աշխատանքները։