ԱՄՆ պատժամիջոցների պատճառով Microsoft կորպորացիան դադարեցրել է համագործակցությունը Միջազգային քրեական դատարանի (ՄՔԴ) հետ։ Կառույցն ստիպված է եղել անցնել այլընտրանքային թվային ծառայությունների։
Թվային ու բանկային խոչընդոտներ. ՄՔԴ-ի պաշտպանության գծով առաջատար փաստաբան Գերտ-Յան Ալեքսանդր Կնոպսի փոխանցմամբ՝ Microsoft-ի հետ կապերի խզումը բարդացրել է փաստաբանների գործը։ Բացի այդ, երկրորդային պատժամիջոցների վտանգի պատճառով բանկերը հրաժարվում են սպասարկել դատարանին, ինչը հարվածի տակ է դնում ընթացիկ հետաքննությունները։
Ազդեցությունը անձնակազմի վրա. Սահմանափակումները կարող են անդրադառնալ դատարանի բոլոր 900 աշխատակիցների վրա՝ բարդացնելով նրանց ճամփորդություններն ու բանկային քարտերի սպասարկումը։ Ներկայում ՄՔԴ-ն աշխատավարձերն ու հոնորարները վճարում է փուլերով՝ երեք ամսվա կտրվածքով։
ԱՄՆ-ի ճնշումը. The Wall Street Journal-ի տվյալներով՝ ԱՄՆ վարչակազմը նախապատրաստում է լայնածավալ պատժամիջոցներ, որոնք կարող են արգելել դոլարային գործարքները և կառույցը կտրել ֆինանսական համակարգի մեծ մասից։
Նախապատմություն. ԱՄՆ նախագահ Դոնալդ Թրամփը դատարանի պաշտոնյաների դեմ սահմանափակումներ նախատեսող հրամանագիրը ստորագրել էր 2025 թվականի փետրվարի 6-ին։ Վաշինգտոնը դատարանին մեղադրում է ԱՄՆ-ի և նրա դաշնակիցների (մասնավորապես՝ Իսրայելի) դեմ ոչ իրավաչափ գործողությունների մեջ։
Ինչու է դա կարևոր Միացյալ Նահանգների կողմից ֆինանսական ու տեխնոլոգիական սահմանափակումների կիրառումը ցույց է տալիս, թե ինչպես կարող են միջազգային իրավական ինստիտուտները կաթվածահար լինել գլոբալ ֆինանսատեխնիկական ենթակառուցվածքներից (Microsoft, դոլարային համակարգ) զրկվելու հետևանքով։
