Միասնական սոցիալական ծառայությունը աջակցում է գործատուներին աշխատուժի պահանջարկի լրացման հարցում

Միասնական սոցիալական ծառայության կողմից գործատուներին մատուցվող բոլոր ծառայություններն իրականացվում են անվճար։

Աշխատանքի և սոցիալական հարցերի նախարարությունը տեղեկացնում է, որ Միասնական սոցիալական ծառայությունը (ՄՍԾ) աջակցություն է տրամադրում աշխատանքի և զբաղվածության ոլորտում՝ գործատուների մոտ առկա աշխատուժի պահանջարկը լրացնելու նպատակով։

ՄՍԾ-ն իրականացնում է մի շարք գործառույթներ, որոնք ուղղված են աշխատաշուկայի պահանջարկի և առաջարկի համադրմանը։ Մասնավորապես՝ ծառայությունը տրամադրում է աջակցություն աշխատուժի պահանջարկի լրացման համար, ինչպես նաև տեղեկատվություն զբաղվածությանն ուղղված ծրագրերի և միջոցառումների վերաբերյալ։

Ծառայության շրջանակում իրականացվում է թափուր աշխատատեղերի մասին տեղեկատվության հավաքագրում և տարածում, կազմակերպվում են թափուր աշխատատեղերի տոնավաճառներ, ինչպես նաև իրականացվում է գործատուների կողմից ներկայացված չափորոշիչներին համապատասխան թեկնածուների ընտրություն։ Ընտրված թեկնածուներին ներկայացվում են համապատասխան աշխատատեղերը։

Նախարարությունը կոչ է անում այն գործատուներին, որոնք ունեն աշխատակիցների կարիք, գրանցել իրենց թափուր աշխատատեղերը www.e-work.am հարթակում կամ կապ հաստատել Միասնական սոցիալական ծառայության տարածքային կենտրոնների հետ։ Տեղեկատվություն ստանալու համար հնարավոր է նաև դիմել ՄՍԾ Զբաղվածության ապահովման և աշխատանքային ներուժի զարգացման վարչություն՝ 060 65 27 17 և 060 65 27 01 հեռախոսահամարներով։

Նշվում է, որ Միասնական սոցիալական ծառայության կողմից գործատուներին մատուցվող բոլոր ծառայություններն իրականացվում են անվճար։