Meta-ն Ավստրալիայում փակել է ավելի քան 540 հազար օգտահաշիվ՝ սոցիալական ցանցերի տարիքային արգելքի պատճառով

Հաշիվների փակումը իրականացվել է նոր օրենսդրության պահանջներին համապատասխանելու նպատակով։

Meta ընկերությունը հայտարարել է, որ Ավստրալիայում սոցիալական ցանցերի նկատմամբ սահմանված նոր իրավական կարգավորումների շրջանակում փակել է ավելի քան 540 հազար օգտահաշիվ։

Նախորդ տարվա դեկտեմբերի 10-ից Ավստրալիայում ուժի մեջ է մտել օրենք, որի համաձայն՝ 16 տարեկանից փոքր օգտատերերի մուտքը արգելվում է 10 խոշոր սոցիալական հարթակներ, այդ թվում՝ Instagram, Facebook, Threads և TikTok։ Օրենքի նպատակն է նվազեցնել սոցիալական ցանցերի հնարավոր վնասակար ազդեցությունը անչափահասների վրա։

Meta-ի փոխանցմամբ՝ դեկտեմբերի 4-ից 11-ն ընկած ժամանակահատվածում ջնջվել է 544,052 օգտահաշիվ, որոնք ընկերության գնահատմամբ պատկանում էին 16 տարեկանից փոքր օգտատերերի։ Նշվում է, որ դրանցից 330,639-ը Instagram հարթակում գրանցված հաշիվներ են եղել։

Ընկերությունը հայտնել է, որ հաշիվների փակումը իրականացվել է նոր օրենսդրության պահանջներին համապատասխանելու նպատակով և հանդիսանում է տարիքային սահմանափակումների կիրառման գործընթացի մաս։