Եվրախորհրդարանի պատգամավորները կոչ են արել առաջիկայում ստորագրել Խաղաղության համաձայնագիրը

Եվրախորհրդարանի պատգամավորները կոչ են արել առաջիկայում ստորագրել Խաղաղության համաձայնագիրը:

Եվրախորհրդարանի մի շարք պատգամավորներ հանդես են եկել համատեղ հայտարարությամբ՝ ողջունելով Վաշինգտոնում Հայաստանի և Ադրբեջանի ղեկավարների հանդիպումը և երկու երկրի հարաբերությունների կարգավորման գործընթացում գրանցված առաջընթացը:

«Բարձր ենք գնահատում Հայաստանի և Ադրբեջանի կառավարությունների վճռականությունը՝ դադարեցնելու երկարատև հակամարտությունը, ինչպես նաև այդ հարցում Միացյալ Նահանգների նշանակալի ներդրումը, որը հիմնված է վերջին տարիներին այդ թվում՝ ԵՄ միջնորդությամբ տեղի ունեցած բանակցությունների վրա»,- ասված է հայտարարության մեջ։

Պատգամավորները կոչ են արել առաջիկայում ստորագրել խաղաղության համաձայնագիրը:

«Երկու երկրների միջև ներքին, երկկողմ և միջազգային փոխադրումների համար հաղորդակցությունների բացման մասին քաղաքական համաձայնությունը, որը հիմնված է պետությունների ինքնիշխանության, տարածքային ամբողջականության և իրավազորության սկզբունքների վրա, կարևոր առաջընթաց է։ Ընդգծում ենք երկրի հարավով երթուղու զարգացման և կառավարման հարցում Միացյալ Նահանգների և երրորդ կողմերի հետ գործակցելու՝ Հայաստանի մտադրությունը, ողջունում ենք ներդրումներ կատարելու՝ Միացյալ Նահանգների պատրաստակամությունը։ Այս կարևորագույն նախագծի իրականացումը կբացահայտի Հարավային Կովկասի հսկայական ներուժը: Տարածաշրջանը կդառնա առևտրի և տնտեսական բարգավաճման կենտրոն՝ փոխադարձաբար օգուտ բերելով բոլոր երկրներին»,- ասված է հայտարարությունում։

Պաշտոնյաները ողջունել են Հայաստանի և Ադրբեջանի հավատարմությունը ՄԱԿ-ի կանոնադրությանը և Ալմաթիի հռչակագրին՝ հույս հայտնելով, որ դա կնպաստի սահմանազատման գործընթացին, կհանգեցնի Հայաստանի տարածքից ադրբեջանական զորքերի լիակատար դուրսբերմանը։ Նաև եվրոպացի պաշտոնյաները կոչ են անում լուծել Ադրբեջանում գտնվող հայ ռազմագերիների և ԼՂ-ից տեղահանված հայերի հարցերը:

«Եվրամիությունը պատրաստ է հետագայում ևս նպաստել տարածաշրջանում կարգավորման գործընթացին։ Այն կարևոր է նաև Հայաստանի տնտեսական և պաշտպանական հարաբերությունների դիվերսիֆիկացման ջանքերի և եվրոպական ձգտումների համատեքստում»,- նշված է հայտարարությա մեջ:

Եվրախորհրդարանի պատգամավորները նաև նշել են, որ Թուրքիայի կառուցողական ներգրավվածությունը մեծ նշանակություն կունենա Վաշինգտոնում գրանցված առաջընթացի ամրապնդման համար։

«Կոչ ենք անում Անկարային՝ արձագանքել Հայաստանի պատրաստակամությանը՝ կարգավորելու երկկողմ հարաբերությունները և բացելու Հայաստան-Թուրքիա սահմանը»,- ասված է հայտարարության մեջ։