Հայաստանի Հանրապետությունը ինքնուրույն է որոշում կայացնում որևէ միության կազմում մնալու կամ դուրս գալու վերաբերյալ։ Ազգային ժողովում կայացած ճեպազրույցի ժամանակ այս մասին հայտարարել է ՀՀ էկոնոմիկայի նախարար Գևորգ Պապոյանը՝ անդրադառնալով ԵԱՏՄ-ից հնչող հարցադրումներին, թե Հայաստանը չի կարող միաժամանակ լինել երկու միություններում։
Ինչու է դա կարևոր. Հայտարարությունը հնչում է Երևան-Մոսկվա տնտեսական լարվածության և դեպի Ռուսաստան հայկական ապրանքների արտահանման սահմանափակումների ֆոնին։ ՌԴ-ն ավելի վերապահումներ էր հայտնել Եվրամիությանն ինտեգրվելու Հայաստանի ձգտումների վերաբերյալ՝ նշելով, որ դա չպետք է արվի ԵԱՏՄ երկրների հաշվին։ Պապոյանն ընդգծել է, որ Հայաստանը շարունակելու է մնալ ԵԱՏՄ-ում այնքան ժամանակ, քանի դեռ դա արդարացված և ճիշտ է համարում։
Հայտարարության առանցքային մանրամասները.
Ինքնիշխան որոշում. Հայաստանն է որոշում իր անդամակցությունը միջազգային կառույցներին և շարունակելու է մնալ ԵԱՏՄ-ում այնքան ժամանակ, քանի դեռ դա համապատասխանում է երկրի շահերին։
Պարտավորությունների կատարում. «Մենք ԵԱՏՄ-ում մեր պարտավորություններն ու պահանջներն ամբողջ ծավալով կատարել ենք և կատարում ենք»,- նշել է էկոնոմիկայի նախարարը։
Պահանջների վերաբերյալ. Պապոյանն ընդգծել է, որ գործընկերներն ունեն հարցադրումների իրավունք, սակայն դեռ պետք է հասկանալ՝ կարող են Հայաստանից որևէ բան պահանջել, թե ոչ։
Նախապատմությունը. Ռուսական կողմի հայտարարություններին, թե Եվրամիության հետ մերձեցումը չպետք է վնասի ԵԱՏՄ-ին, հաջորդել էին Ռուսաստանի Դաշնություն հայկական արտադրանքի արտահանման որոշակի սահմանափակումներն ու մաքսային խոչընդոտները։
