1. Հայաստանն ու ԱՄՆ-ը նախաստորագրել են ռազմավարական համաձայնագիր
Երևանում ՀՀ արտաքին գործերի նախարար Արարատ Միրզոյանն ու ԱՄՆ պետքարտուղար Մարկո Ռուբիոն նախաստորագրել են ռազմավարական համագործակցության շրջանակային համաձայնագիր։
Ոլորտներ. Փաստաթղթում առանձնակի ընդգծվել է արհեստական բանականության, նորարարությունների և հանքանյութերի ոլորտներում համատեղ աշխատանքի կարևորությունը։ Կողմերի փոխանցմամբ՝ սա երկկողմ հարաբերությունները բարձրացնում է որակական նոր մակարդակի և կբացի նոր տնտեսական հնարավորություններ։
2. Պեսկովի նախազգուշացումը գազի գնի վերաբերյալ
ՌԴ նախագահի մամուլի քարտուղար Դմիտրի Պեսկովը հայտարարել է, որ ռուսական գազի ներկայիս արտոնյալ և «բավականին գրավիչ» գինը Հայաստանի համար կարող է վերանալ, եթե Երևանը որոշի դուրս գալ Եվրասիական տնտեսական միությունից (ԵԱՏՄ)։
Շուկայական հիմունքներ. Պեսկովը շեշտել է, որ այդ դեպքում կապույտ վառելիքի գինը կսկսի ձևավորվել բացառապես շուկայական հիմունքներով՝ ակնարկելով Հայաստանի իշխանությունների՝ դեպի Եվրամիություն հակված քաղաքական հայտարարությունները։
3. Ճգնաժամ Լարսում. Հայկական բեռնատարները հետ են վերադարձվում
Ռուս-վրացական սահմանին արդեն մի քանի օր է՝ արգելափակված է մոտ 100 հայկական բեռնատար։ Վարորդները ստեղծված իրավիճակը որակում են որպես քաղաքական ճնշում։
Պատրվակներ. Ձկնեղենով, հատապտուղներով և ծաղիկներով բեռնված մեքենաները ստուգումների պատրվակով սահմանից հետ են վերադարձնում Հայաստան։ Միևնույն ժամանակ, ջերմոցների ու ձկնաբուծարանների ստուգման նպատակով Երևան են ժամանել Ռոսսելխոզնադզորի տեսուչները։ Հիշեցնենք, որ Ռուսաստանն ավելի վաղ արգելափակել էր հայկական ալկոհոլի, հանքային ջրի և ծաղիկների ներմուծումը։
4. Քվորումի բացակայություն. ԱԺ նիստը տապալվել է
Ազգային ժողովի հերթական նիստը չի կայացել, քանի որ մեկնարկին դահլիճում գրանցվել էր ընդամենը 5 պատգամավոր:
Ընդմիջում. Նիստը նախագահող ԱԺ փոխնախագահ Հակոբ Արշակյանը հայտարարել է 4-ժամյա ընդմիջում՝ հիշեցնելով, որ ըստ կանոնակարգի՝ գրանցումը շարունակվում է մինչև անհրաժեշտ թվով պատգամավորների ներկայությունը։ Նիստի մեկնարկի համար անհրաժեշտ է առնվազն 54 պատգամավոր: Քառօրյայի օրակարգում ներառված է 35 հարց։
5. Բաքվում մեկնարկում է Արցախի նախկին ղեկավարության վերաքննիչ բողոքի քննությունը
Ադրբեջանական ԶԼՄ-ների փոխանցմամբ՝ Բաքվի վերաքննիչ դատարանն այսօրվանից վարույթ է ընդունել Արայիկ Հարությունյանի, Արկադի Ղուկասյանի, Բակո Սահակյանի, Դավիթ Իշխանյանի, Դավիթ Բաբայանի, Լևոն Մնացականյանի և մյուսների դատավճիռների դեմ ներկայացված բողոքը։ Գործը քննվելու է դատավոր Էլմար Ռագիմովի նախագահությամբ։
6. Ռուսական հարվածներ Օդեսային և նոր սպառնալիք Կիևին
Հարձակում Օդեսայի վրա. Ռուսական զինուժի գիշերային ինտենսիվ հարվածների հետևանքով Օդեսայում զոհվել է մեկ, վիրավորվել՝ երեք քաղաքացի։
Զգուշացում Կիևին. Մոսկվան հայտարարել է Ուկրաինայի մայրաքաղաքի ուղղությամբ համակարգված հարվածներ հասցնելու մտադրության մասին՝ թիրախավորելով «որոշումների կայացման կենտրոնները»։ Միջազգային կազմակերպությունների և առաքելությունների աշխատակիցներին հորդորել են շուտափույթ լքել քաղաքը։
