ԱՄՆ-ում առաջարկել են մուտքի արգելք դնել այն երկրների վրա, որոնց քաղաքացիները սպառնալիք են ներկայացնում

Նախարարը չի հստակեցրել, թե որ կոնկրետ երկրների մասին կարող է խոսք գնալ տվյալ նախաձեռնության համատեքստում:

ԱՄՆ ներքին անվտանգության նախարար Քրիստի Նոեմը առաջարկել է մուտքի լիակատար արգելք սահմանել այն երկրների համար, որոնց քաղաքացիներն ամենից հաճախ են սպառնալիք ներկայացնում ազգային անվտանգության համար։

«Ես հենց նոր հանդիպեցի [ԱՄՆ] նախագահ Դոնալդ Թրամփի հետ։ Ես խորհուրդ եմ տալիս ամբողջական արգելք մտցնել [ԱՄՆ] մուտքի համար բոլոր այն անիծյալ երկրների համար, որոնք մեր պետությունը հեղեղել են մարդասպաններով, մակաբույծներով և արտոնություններով տարված թմրամոլներով», - գրել է Նոեմն իր X սոցիալական ցանցի էջում։

Միաժամանակ, նախարարը չի հստակեցրել, թե որ կոնկրետ երկրների մասին կարող է խոսք գնալ տվյալ նախաձեռնության համատեքստում։ Ավելի վաղ ԱՄՆ Քաղաքացիության և ներգաղթի ծառայությունը հայտարարել էր, որ կազմակերպելու է 19 երկրներից ապաստան հայցողներին գրին քարտ տրամադրելու իրավաչափության ստուգում։ Այս միջոցառումը պետք է վերաբերի Աֆղանստանի, Բուրունդիի, Վենեսուելայի, Հաիթիի, Իրանի, Եմենի, Կուբայի, Լաոսի, Լիբիայի, Մյանմայի, Կոնգոյի Հանրապետության, Սոմալիի, Սուդանի, Սիերա Լեոնեի, Տոգոյի, Թուրքմենստանի, Չադի, Հասարակածային Գվինեայի և Էրիթրեայի քաղաքացիներին։ Նաև ժամանակավորապես դադարեցվել է ԱՄՆ-ում օտարերկրյա քաղաքացիներին ապաստան տրամադրելու դիմումների քննարկումը։ Այս բոլոր միջոցները հաջորդել են նախորդ շաբաթ ԱՄՆ Ազգային գվարդիայի մարտիկների վրա տեղի ունեցած հարձակմանը։

Ինչպես ավելի վաղ հայտարարել էր Թրամփը, իր վարչակազմը նախատեսում է արտաքսել երկիր ժամանած ապաստան հայցողներին և անորոշ ժամանակով կդադարեցնի երրորդ աշխարհի երկրներից մարդկանց տեղավորումը։ ԱՄՆ պետքարտուղար Մարկո Ռուբիոն նաև հայտարարել է, որ ամերիկյան իշխանությունները կասեցնում են Աֆղանստանի քաղաքացիներին վիզաների տրամադրումը։