Մարտի 12-ին Թաիլանդից Թբիլիսի է ժամանել 18 ՀՀ քաղաքացի

Առաջիկա օրերին նախատեսվում է Թաիլանդից ևս 21 ՀՀ քաղաքացու վերադարձը։

Մերձավոր Արևելքում ստեղծված իրավիճակի հետևանքով տարանցիկ թռիչքների չեղարկման պայմաններում Չինաստանում ՀՀ դեսպանությունն այս ընթացքում կապ է պահպանել զբոսաշրջային նպատակով Թաիլանդում գտնվող ՀՀ քաղաքացիների հետ՝ աջակցություն ցուցաբերելով վիզաների երկարացման և Հայաստան վերադարձի հարցերում։

ԱԳՆ մամուլի խոսնակի փոխանցմամբ՝ չվերթների չեղարկումից ի վեր ՀՀ դեսպանության և Բանգկոկում ՀՀ պատվավոր հյուպատոսի գրասենյակի հետ կապ է հաստատել 93 ՀՀ քաղաքացի, որոնցից 42-ն արդեն վերադարձել է Հայաստան։

Չինաստանում ՀՀ դեսպանությունը ՀՀ քաղաքացիներին տրամադրել է տեղեկատվություն վրացական ավիաընկերության կողմից իրականացված Բանգկոկ–Թբիլիսի չարտերային չվերթի վերաբերյալ և մշտական կապի միջոցով աջակցել տոմսերի ամրագրման գործընթացին։

Մարտի 12-ին նշված չվերթով Թբիլիսի է ժամանել 18 ՀՀ քաղաքացի։ Նրանց օդանավակայանում դիմավորել է Վրաստանում ՀՀ դեսպանության դիվանագետը, և բոլոր ցանկացողները դեսպանության կողմից տրամադրված անվճար ավտոբուսով վերադարձել են Հայաստան։

Առաջիկա օրերին նախատեսվում է Թաիլանդից ևս 21 ՀՀ քաղաքացու վերադարձը։