Մամուլի շենքի ապագայի վերաբերյալ վերջնական որոշում դեռ չկա

Նախագծերից մեկում դիտարկվում է նաև հյուրանոցային համալիրի տարբերակը, սակայն դա պարտադիր չէ։

Երևանի Մամուլի շենքի ապագայի վերաբերյալ վերջնական որոշում դեռևս չի ընդունվել, իսկ համացանցում տարածվող պատկերները ներկայացնում են միայն հնարավոր տարբերակներ։ Այս մասին «Արմենպրես»-ին հայտնել է Պետական գույքի կառավարման կոմիտեի հանրային կապերի պատասխանատու Արաքս Առաքելյանը։

Նրա խոսքով՝ ներկայում մշակվում է շենքի վերանորոգման և վերագործարկման նախագիծ, որը նախատեսում է այն վերածել ժամանակակից, բազմաֆունկցիոնալ համալիրի։

Նախագիծը մշակվել է PROSPECT24 ՓԲԸ-ի կողմից՝ «Դիգնիսի» ՍՊԸ-ի, «Բի-Էս-Սի» բիզնեսի աջակցման կենտրոնի և «Khachaturian Architects» ստուդիայի մասնակցությամբ, որոնք հաղթել են համապատասխան մրցույթում։

Հուշագրով նախատեսված է, որ մինչև գույքի օտարումը պետք է կազմվի ներդրումային փաթեթ՝ ներառելով շենքի օգտագործման տարբերակները, քաղաքաշինական և տեխնիկական սահմանափակումները, ինչպես նաև անհրաժեշտ թույլտվությունները։

Նշվում է, որ ապագա գնորդը, բացի գույքի արժեքից, պետք է վճարի նաև նախագծի կազմման համար, որի արժեքը կարող է կազմել մինչև գույքի գնահատված արժեքի 1.5%-ը, բայց ոչ ավելի, քան 30 միլիոն դրամ։

Առաքելյանը ընդգծել է, որ համացանցում տարածված պատկերները վերջնական չեն և կրում են էսքիզային բնույթ։

«Դրանք պարզապես ներկայացնում են, թե ինչպես կարելի է շահագործել շենքը։ Վերջնական որոշումը կախված կլինի ապագա գնորդից»,- նշել է նա։

Նախագծերից մեկում դիտարկվում է նաև հյուրանոցային համալիրի տարբերակը, սակայն դա պարտադիր չէ։

Պաշտոնյան վստահեցրել է, որ շենքի քանդում նախատեսված չէ, և խոսքը վերաբերում է վերականգնմանն ու վերանորոգմանը։

Նա նաև նշել է, որ ներկայում շենքում գործող կազմակերպությունների գործունեության մեջ փոփոխություն չկա։ Շենքում առկա է շուրջ 47 տարածք, որոնք տրամադրված են վարձակալությամբ կամ անհատույց օգտագործման իրավունքով։

Հնարավոր որոշման դեպքում բոլոր շահառուները նախապես կծանուցվեն։