Լոռու մարզում նկատված ազնվացեղ եղջերուն վերադարձվել է «Դիլիջան» ազգային պարկ

Կազմակերպությունը հորդորում է պահպանել անվտանգության մի շարք կանոններ

Բնության համաշխարհային հիմնադրամի հայաստանյան մասնաճյուղը (WWF Հայաստան) տեղեկացնում է, որ Լոռու մարզում վերջերս նկատված կովկասյան ազնվացեղ եղջերուն վերադարձվել է «Դիլիջան» ազգային պարկ՝ մարդու միջամտությունից բխող հնարավոր ռիսկերը կանխելու նպատակով։

WWF-ից հայտնում են, որ քաղաքացիական անձանց կողմից կենդանու հետ անմիջական շփման, կերակրման կամ նկարահանման փորձերը կարող են խաթարել նրա բնական վարքը և ստեղծել անվտանգության վտանգներ ինչպես մարդկանց, այնպես էլ կենդանու համար։ Նշվում է, որ վայրի կենդանին նույնիսկ խաղաղ պահվածքի դեպքում կարող է առանց դիտավորության վնաս հասցնել։

Կազմակերպությունը հորդորում է պահպանել անվտանգության մի շարք կանոններ՝
չմոտենալ և չդիպչել եղջերուին,
չկերակրել նրան,
խուսափել բարձր ձայներից և հանկարծակի շարժումներից,
երթևեկելիս կենդանու նկատման դեպքում նվազեցնել արագությունը,
տեղեկացնել շրջապատին հնարավոր հանդիպումների մասին՝ նվազեցնելու համար մարդու և կենդանու միջև կոնֆլիկտի հավանականությունը։

Հիշեցվում է, որ եղջերուների տեղաշարժը վերահսկվում է ռադիովզկապի միջոցով։

Կենդանիները գտնվում են պետական պահպանության ներքո։ Ազնվացեղ եղջերուին վնասելու դեպքում պետությանը պատճառված վնասը գնահատվում է 15 միլիոն դրամ, ինչպես նաև կիրառվում են պատասխանատվության միջոցներ ՀՀ Քրեական օրենսգրքի 386-րդ հոդվածով։

Նշվում է, որ «Կովկասյան ազնվացեղ եղջերուի վերաբնակեցումը Հայաստանում» ծրագիրը իրականացվում է 2013 թվականից՝ WWF-Հայաստանի և ՀՀ շրջակա միջավայրի նախարարության կողմից։