Հեղուկ գազի գինը տատանվում է․ հիմնական պատճառները

Ճանապարհների փակ լինելու հետևանքով ներմուծման ժամկետների երկարաձգումը հանգեցնում է տրանսպորտային ծախսերի աճի։

Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանը անդրադարձել է Հայաստանում հեղուկ գազի գների բարձրացման շուրջ արձանագրվող դժգոհություններին՝ ընդգծելով, որ շուկայում առկա են գների ինչպես նվազման, այնպես էլ բարձրացման փուլեր։

Նրա խոսքով՝ հեղուկ գազը բորսայական ապրանք է, և դրա գինը ձևավորվում է միջազգային շուկաներում տեղի ունեցող փոփոխությունների ազդեցությամբ։ «Երբ ասում եք՝ ամեն անգամ թանկանում է, այդպես չէ։ Ամեն անգամ էժանանում է, որ հետո թանկանում է»,- նշել է Գևորգյանը։

Հանձնաժողովի նախագահի տեղեկացմամբ՝ Հայաստանի Հանրապետությունում հեղուկ գազի շուկայում գործում է 100-ից ավելի ներմուծող տնտեսվարող, և որևէ սուբյեկտի ներմուծման մասնաբաժինը չի գերազանցում 9%-ը։ Այս պայմաններում, նրա գնահատմամբ, շուկայում գերիշխող դիրքի առկայության կամ դրա չարաշահման մասին խոսել հնարավոր չէ։

Գևորգյանը նաև բացառել է գների արհեստական բարձրացման հնարավորությունը՝ նշելով, որ դժվար է պատկերացնել, որ նման թվով տնտեսվարողներ կարող են պայմանավորվել գների շուրջ։ «Ասել, որ կա գերիշխող դիրք, որը չարաշահվում է, չկա»,- ընդգծել է նա։

Գների բարձրացման պատճառների շարքում Հանձնաժողովի նախագահը նշել է ոչ միայն միջազգային բորսայական գների փոփոխությունները, այլև լոգիստիկ խնդիրները։ Մասնավորապես՝ ճանապարհների փակ լինելու հետևանքով ներմուծման ժամկետների երկարաձգումը հանգեցնում է տրանսպորտային ծախսերի աճի։ «Մեքենան, որը պետք է 10 օրում գար, գալիս է 20 օրում, ինչի արդյունքում թանկանում է նաև տեղափոխումը»,- պարզաբանել է նա։