Գրադարանները պետք է վերածվեն համայնքային ակտիվ կենտրոնների

Գրադարանները պետք է վերածվեն համայնքային ակտիվ կենտրոնների:

ԿԳՄՍ նախարարության աջակցությամբ և Գրադարանային միությունների և հաստատությունների միջազգային դաշնության (IFLA) հետ համագործակցությամբ Հայկական գրադարանային ասոցիացիան կազմակերպել է «Գրադարանների վերափոխումը դինամիկ համայնքային և մշակութային կենտրոնների» վերապատրաստման ծրագիր՝ նախատեսված գրադարանավարների համար։

Վերապատրաստումը անցկացվում է սեպտեմբերի 16-19-ը Խնկո Ապոր անվան ազգային մանկական գրադարանում, և ծրագրին մասնակցում է շուրջ 100 մասնագետ Երևանից և մարզերից։ Նախարարը ողջունել է մասնակիցներին՝ ընդգծելով, որ ծրագրի միջոցով նպատակն է կատարել ոլորտային բարեփոխումներ, որոնք կօգնեն գրադարաններին դառնալ համայնքային ակտիվ կենտրոններ՝ ընթերցանության, տեղեկատվության վերլուծության և հանրության հետ հաղորդակցության կարևոր հարթակներ։

Ծրագիրն ընդգրկում է երկու հիմնական ուղղություն՝ ընթերցանության կազմակերպման և խթանման նորարարական մեթոդներ, ինչպես նաև նորարարական ծառայություններ, տեղեկատվական գրագիտություն և հանրային գրադարանների փոխակերպում։

Դասընթացի ընթացքում մասնակիցները կծանոթանան գրադարանային տարածքների վերափոխման հնարավորություններին՝ գրքերի պահոցներից դեպի թվային հարթակ և համայնքային միջավայր, կքննարկվեն գրադարանների դերը 21-րդ դարում, գրքերի ընտրության և ընթերցանության խթանման արդյունավետ փորձերը, ինչպես նաև գրադարանավարի դերը ընթերցանության կազմակերպման գործում։

Նախարարը շեշտել է նաև դպրոցական և բուհական գրադարանների կարևորությունը՝ նշելով, որ դրանք պետք է լինեն ուսումնական գործընթացի մի մաս, ապահովեն գրքի և տեղեկատվության մատչելիությունը, աջակցեն ուսուցողական նախագծերին և ձևավորեն նոր, համայնքային գրադարանային մշակույթ։

Ծրագրի շրջանակում մասնակիցները հնարավորություն կունենան ծանոթանալ միջազգային փորձին, կիրառել նորարարական մեթոդներ և զարգացնել մասնագիտական հմտությունները՝ նպաստելով գրադարանների արդիականացմանը և հանրության հետ հաղորդակցության խթանմանը։