Լավրովը կարծում է, որ «3+3» ձևաչափով հանդիպումների վերսկսման ճիշտ ժամանակն է

Ռուսաստանի արտաքին գործերի նախարար Սերգեյ Լավրովը կարծում է, որ այժմ ժամանակն է վերսկսել «3+3» խորհրդատվական տարածաշրջանային հարթակի հանդիպումները՝ մի կողմից Ադրբեջանի, Հայաստանի և Վրաստանի, մյուս կողմից՝ երեք խոշոր տարածաշրջանային տերությունների՝ Իրանի, Ռուսաստանի և Թուրքիայի միջև։

Լավրովը հիշեցրել է, որ այս հարթակի ստեղծման նախաձեռնողները Թուրքիան և Ադրբեջանն են եղել։

«Մենք երկու տարի առաջ նախարարների մակարդակով մի քանի հանդիպում ենք ունեցել։ Հանդիպումներ եղել են նաև փոխնախարարների մակարդակով»,- նշել է ՌԴ ԱԳ նախարարը՝ ելույթ ունենալով Միջազգային հարաբերությունների Մոսկվայի պետական ինստիտուտի ուսանողների և պրոֆեսորադասախոսական կազմի առջև։

«Հիմա մենք կարծում ենք, որ ժամանակն է վերսկսել [այս ձևաչափը]։ Մեր իրանցի հարևաններն աջակցում են այս գործընթացներին, իսկ Թուրքիան և Ադրբեջանը, ինչպես արդեն ասացի, այս հարթակի նախաձեռնողներն էին»։

«Այնպես որ, հուսով եմ, որ մոտ ապագայում այս ձևաչափը կվերսկսվի», - եզրափակել է նախարարը։