Լավրովն ու Արաղչին քննարկել են Իրանի միջուկային ծրագրի շուրջ ստեղծված իրավիճակը

Մտքերի փոխանակում է եղել փոխադարձ հետաքրքրություն ներկայացնող մի շարք այլ արդիական տարածաշրջանային հարցերի շուրջ։

Ռուսաստանի և Իրանի արտաքին գործերի նախարարներ Սերգեյ Լավրովը և Աբբաս Արաղչին քննարկել են ռուս-իրանական հարաբերությունները և իրանական միջուկային ծրագրի շուրջ ստեղծված իրավիճակը։ Այս մասին հայտնել է Ռուսաստանի արտաքին գործերի նախարարության մամուլի ծառայությունը։

Այսօր ավելի վաղ հեռախոսազրույց են ունեցել նաև ՌԴ–ի և Իրանի նախագահները։

Իրանական կողմի նախաձեռնությամբ տեղի ունեցած զրույցի ընթացքում Արաղչին Լավրովին մանրամասն տեղեկացրել է Մեծ Բրիտանիայի, Գերմանիայի և Ֆրանսիայի գործընկերների հետ Իրանի միջուկային ծրագրի քննարկումների արդյունքները։

Նշվում է, որ ռուսաստանյան կողմը հաստատել է իր պատրաստակամությունը` շարունակել ներդրում ունենալ Իրանի միջուկային ծրագրի շուրջ ստեղծված իրավիճակի կարգավորման և Մերձավոր Արևելքում լարվածության թուլացման դիվանագիտական ջանքերում։

Մտքերի փոխանակում է եղել փոխադարձ հետաքրքրություն ներկայացնող մի շարք այլ արդիական տարածաշրջանային հարցերի շուրջ։