Վերջին երեք տարիները դարձել են ամենատաքը դիտարկումների 176-ամյա պատմության ընթացքում. ՄԱԿ

Այս մասին նշվում է «Գլոբալ կլիմայի վիճակը 2025 թվականին» զեկույցում։

ՄԱԿ-ի Օդերևութաբանության համաշխարհային կազմակերպությունը (ՕՀԿ) հայտարարել է, որ 2023, 2024 և 2025 թվականները եղել են ամենատաք տարիները դիտարկումների ողջ պատմության ընթացքում։

Այս մասին նշվում է «Գլոբալ կլիմայի վիճակը 2025 թվականին» զեկույցում։

Ըստ կազմակերպության՝ վերջին երեք տարիները ամենատաքն են ցամաքի և օվկիանոսի դիտարկումների 176-ամյա պատմության մեջ։

Միևնույն ժամանակ, 2025 թվականը փոքր-ինչ զիջել է 2024-ի ռեկորդային շոգին և դասվում է երկրորդ կամ երրորդ ամենատաք տարիների շարքում։

Փորձագետները այս փոփոխությունը բացատրում են կլիմայական երևույթների փոփոխությամբ՝ Էլ Նինյոյից Լա Նինյայի անցմամբ։

Զեկույցում նշվում է, որ տարբեր երկրներում գրանցվել են ջերմաստիճանի նոր ռեկորդներ։ Պորտուգալիայում և Իսպանիայում գրանցվել են հունիս ամսվա ռեկորդային ջերմաստիճաններ՝ համապատասխանաբար 46.6°C և 46.0°C։

Թուրքիայում հուլիսին գրանցվել է 50.5°C, իսկ Ճապոնիայում՝ պատմության ամենաբարձր ցուցանիշը՝ 41.8°C։

Բացի այդ, Չինաստանը, Ճապոնիան և Կորեայի Հանրապետությունը ապրել են իրենց ամենաշոգ ամառը դիտարկումների ամբողջ պատմության ընթացքում։

Գիտնականների խոսքով՝ Երկրի կլիման մեծապես պայմանավորված է Էլ Նինյո և Լա Նինյա երևույթներով, որոնք պարբերաբար փոխարինում են միմյանց։

Այս երևույթները ազդում են օվկիանոսային հոսանքների և մթնոլորտային շրջանառության վրա՝ առաջացնելով երաշտներ որոշ տարածաշրջաններում և ուժեղ տեղումներ՝ մյուսներում։

Զեկույցը ևս մեկ անգամ ընդգծում է գլոբալ տաքացման շարունակական միտումը և դրա ազդեցությունը եղանակային ծայրահեղ երևույթների վրա։