Վերջին 1 տարում Հայաստանում մոտ 30 %-ով աճել է Հայաստանից ծաղկի արտահանումը

Պղպեղի ջերմատնային արտադրությունը ևս արձանագրել է զգալի աճ։

ՀՀ կառավարությունը աջակցել է Ազգային ժողովի պատգամավոր Ծովինար Վարդանյանի նախաձեռնած օրենսդրական նախագծի մշակմանը, որը միտված է ինտենսիվ գյուղատնտեսության և ջերմատնային տնտեսությունների կառուցման համար տուրքերի նվազեցմանը և վարչարարական գործընթացների արագացմանը։ Այդ մասին հունվարի 15-ի կառավարության նիստում հայտարարել է ՀՀ էկոնոմիկայի նախարար Գևորգ Պապոյանը։

Նախարարի խոսքով՝ տվյալ ուղղությամբ աշխատանքներն արդեն ընթացքի մեջ են, և նախաձեռնությունը նպատակ ունի խթանել բարձր արտադրողականություն ունեցող գյուղատնտեսական համալիրների զարգացումը։

Գևորգ Պապոյանը ներկայացրել է նաև վերջին մեկ տարվա վիճակագրական տվյալները՝ ընդգծելով ոլորտում արձանագրված աճը։ Մասնավորապես, վերջին մեկ տարվա ընթացքում Հայաստանից ծաղկի արտահանումը աճել է մոտ 30 տոկոսով, ինչը, ըստ նախարարի, հիմնականում պայմանավորված է նոր ջերմատնային համալիրների արտադրանքի ավելացմամբ։

Նախարարի խոսքով՝ պղպեղի ջերմատնային արտադրությունը ևս արձանագրել է զգալի աճ․ մեկ տարվա ընթացքում արտադրության ծավալներն ավելացել են շուրջ 40 տոկոսով։ Բացի այդ, կանաչեղենի արտադրության և արտահանման ուղղությամբ գրանցվել է 10 և ավելի տոկոս աճ։

Կառավարության ակնկալիքով՝ տուրքերի նվազեցման և ընթացակարգերի պարզեցման արդյունքում ինտենսիվ գյուղատնտեսության ոլորտում ներդրումային ակտիվությունը կշարունակի աճել՝ նպաստելով արտահանման ծավալների և գյուղատնտեսական արտադրության մրցունակության բարձրացմանը։