Սողանքի հետևանքով Սուդանում 1000 մարդ է զոհվել

Խմբավորման առաջնորդ Աբդելվահիդ Մոհամեդ Նուրի փոխանցմամբ՝ սողանքը տեղի է ունեցել օգոստոսի 31-ին՝ մի քանի օր տևած հորդառատ անձրևներից հետո։

Սուդանի արևմտյան մասում, Մարրա լեռների շրջանում, սողանքի հետևանքով ամբողջությամբ ավերված գյուղում առնվազն 1000 մարդ է զոհվել, կենդանի է մնացել միայն մեկ բնակիչ. գրում է CNN-ը՝ հղում անելով Սուդանի ազատագրական շարժմանը։

Խմբավորման առաջնորդ Աբդելվահիդ Մոհամեդ Նուրի փոխանցմամբ՝ սողանքը տեղի է ունեցել օգոստոսի 31-ին՝ մի քանի օր տևած հորդառատ անձրևներից հետո։

Շարժումը, որը վերահսկում է Դարֆուրի այդ տարածքը, դիմել է ՄԱԿ-ին և միջազգային մարդասիրական կազմակերպություններին՝ զոհվածների մարմինները հայտնաբերելու և դուրս բերելու գործում աջակցություն ցուցաբերելու համար։

«Գյուղն այժմ ամբողջությամբ հավասարեցվել է հողին», – ընդգծել է հայտարարությունը։

Դարֆուրի Մարրա լեռների շրջանը բնակչության համար դարձել էր ապաստարան. այստեղ էին տեղափոխվել հյուսիսային նահանգի բնակիչները՝ փախչելով Սուդանի բանակի և «Արագ աջակցության ուժեր» (RSF) կիսառազմական խմբավորման միջև ընթացող մարտերից։ Տարածքում, սակայն, սուր է սննդամթերքի և դեղորայքի պակասը։

Ավելի քան երկու տարի շարունակվող քաղաքացիական պատերազմը Սուդանի բնակչության կեսից ավելին հասցրել է սովի եզրին և միլիոնավոր մարդկանց ստիպել լքել իրենց տները։ Ներկայումս կրակի տակ է գտնվում նաև Հյուսիսային Դարֆուրի մայրաքաղաք Ալ-Ֆաշիրը։