ՔԿՀ-ներում կունենանք հատուկ խցեր, որտեղ կպահվեն ինքնավնասման հակում ունեցող անձինք. Գալյան

Ցավալի է, որ ունենք մահվան դեպքերի աճ, որոնց մի մասն է միայն ինքնասպանություն: Բազմիցս խոսել եմ այն աշխատանքների մասին, որոնց արդյունքում այդ դեպքերը կնվազեն կամ կհասնեն զրոյի: Այդ մասին Կառավարության ճեպազրույցի ժամանակ ասաց ՀՀ արդարադատության նախարար Սրբուհի Գալյանը՝ անդրադառնալով իրավապաշտպանների ահազանգերին, թե քրեակատարողական հիմնարկներում ինքնասպանության և մահվան դեպքերի թիվն աճում է. միայն այս տարվա վերջին ամիսներին 17 նման դեպք է գրանցվել:

Այս համատեքստում Սրբուհի Գալյանը հիշեցրեց, որ «Արմավիր» քրեակատարողական հիմնարկում բացվել է բժշկական ստացիոնար բաժանմունք՝ լիովին վերանորոգված, վերազինված բժշկական նորագույն սարքավորումներով, որը հնարավորություն կտա անազատության մեջ գտնվող անձանց համար ապահովել բժշկական պատշաճ սպասարկում: Ըստ նախարարի՝ այս քայլը միտված է բարձրաձայնված խնդրի լուծմանը:

«Իհարկե, միայն սա անելով՝ խնդիրը չենք լուծի: Մենք կարիք ունենք անհատապես աշխատել այն անձանց հետ, որոնք ինքնավնասման հակում ունեն, իսկ այդպիսիք, ցավոք, այսօր անազատության մեջ կան: Այդ առումով մենք արդեն ավարտին ենք հասցնում հոգեկան առողջության խնդիրներ ունեցող անձանց հաշվառման գործընթացը, որպեսզի դրանից հետ աշխատանքը լինի առավել թիրախային:

Դրանից բացի՝ արդեն իսկ ձեռնարկել ենք խցային պայմանների վերանայման գործընթաց և առաջիկայում կունենանք հատուկ խցեր, որտեղ կպահվեն ինքնավնասման հակում ունեցող անձինք՝ զրկելով իրենց կյանքին վերջ տալու հնարավորություններից, կամ գոնե մինիմումի կհասցնենք այդ հնարավորությունները, որոնք կարող են օգտագործվել կյանքին վերջ տալու նպատակով:

Մտածում ենք նաև ժամանակավոր խցեր ունենալ, որոնք զինված կլինեն տեսախցիկներով, և այնտեղ կտեղափոխվեն այն անձինք, որոնք սուր իրավիճակում են՝ ինքնավնասման հակվածությամբ: Այս համալիր աշխատանքի արդյունքում, կարծում եմ, առաջիկայում կունենանք նմանատիպ դեպքերի նվազում»,- ասաց նա: