Կկարգավորվեն հարկային և մաքսային մարմինների՝ հանրային ծառայողների կողմից ֆիզիկական ուժի, հատուկ միջոցների, զենքի օգտագործման հետ կապված հարաբերությունները

Տնտեսական հարցերի մշտական հանձնաժողովի անդամ Հայկ Ցիրունյանը ներկայացրել է գլխադասային հանձնաժողովի դրական եզրակացությունը նախագծի վերաբերյալ:

Օրենսդրական նախաձեռնությամբ կկարգավորվեն հարկային և մաքսային մարմինների հանրային ծառայողների կողմից  ֆիզիկական ուժի, հատուկ միջոցների և զենքի օգտագործման հետ կապված հարաբերությունները:

Խորհրդարանը սեպտեմբերի 8-ին առաջին ընթերցմամբ քննարկել է  ««Հարկային ծառայության մասին» օրենքում փոփոխություններ կատարելու մասին» և ««Մաքսային ծառայության մասին» օրենքում փոփոխություններ կատարելու մասին» օրենքների նախագծերի փաթեթը:

Օրենսդրական նախաձեռնության անհրաժեշտությունը պայմանավորված է նրանով, որ 2023 թվականի հունիսի 1-ից գործում է «Զենքի շրջանառության կարգավորման մասին» օրենքը: Առաջարկվող փոփոխություններով նախատեսվում է «Հարկային ծառայության մասին» և «Մաքսային ծառայության մասին» օրենքների դրույթները համապատասխանեցնել «Զենքի շրջանառության կարգավորման մասին» օրենքի կարգավորումներին:

ՀՀ պետական եկամուտների կոմիտեի նախագահի տեղակալ Համլետ Սահակյանը մանրամասն ներկայացրել է առաջարկվող փոփոխությունները: Նշվել է, որ կոմիտեի սպառազինության մեջ կարող են ընդգրկվել «Զենքի շրջանառության կարգավորման մասին» օրենքով նախատեսված զենքի համապատասխան տեսակներ: Կոմիտեի  սպառազինության մեջ ընդգրկվող զենքի տեսակները՝ ըստ կոմիտեի կառուցվածքային ստորաբաժանումների, պաշտոնների և ծառայողական պարտականությունների, սահմանվում են հարկային մարմնի ղեկավարի հրամանով:

Տնտեսական հարցերի մշտական հանձնաժողովի անդամ Հայկ Ցիրունյանը ներկայացրել է գլխադասային հանձնաժողովի դրական եզրակացությունը նախագծի վերաբերյալ: