Կապանի «Սյունիք» օդանավակայանի միջազգային կարգավիճակի հարցով նախատեսվում են քննարկումներ բաժնետերերի հետ

Ներկայում Կապանի «Սյունիք» օդանավակայանը սպասարկում է միայն ներքին չվերթեր:

Կապանի «Սյունիք» օդանավակայանը միջազգային դարձնելու նպատակով ՀՀ տարածքային կառավարման և ենթակառուցվածքների նախարարությունը նախատեսում է քննարկումներ սկսել օդանավակայանի բաժնետերերի հետ։ Այդ մասին Sputnik Արմենիային հայտնել են նախարարությունից՝ մեկնաբանելով կառավարության հունվարի 22-ի նիստում ներկայացված ծրագրերը։

Կառավարության նույն նիստում հաստատվել են Հայաստանի միջազգային օդանավակայանների կոնցեսիայի պայմանագրի փոփոխությունները՝ կնքված «Corporacion America» ընկերության հետ, որը պատկանում է արգենտինահայ գործարար Էդուարդո Էռնեկյանի ընտանիքին։

Ներկայում Կապանի «Սյունիք» օդանավակայանը սպասարկում է միայն ներքին չվերթեր՝ Երևան–Կապան և հակառակ ուղղությամբ։

Նախարարությունից հայտնել են, որ օդանավակայանի միջազգային կարգավիճակ ստանալու ծրագրերը գտնվում են նախնական փուլում։ Օդանավակայանի բաժնետերերի հետ աշխատանքային քննարկումներ դեռ չեն մեկնարկել, ինչի հետևանքով այս պահին հստակեցված չէ սահմանային վերահսկողության, թռիչքուղիների և այլ ենթակառուցվածքների համար անհրաժեշտ լրացուցիչ ներդրումների ծավալը և իրականացման ժամկետները։

Նախկին կոնցեսիոն պայմանագրով «Corporacion America»-ն ուներ նախապատվության իրավունք՝ «Զվարթնոց» օդանավակայանից 250 կմ շառավղով ցանկացած նոր միջազգային օդանավակայանի կոնցեսիան ստանձնելու համար։ Քանի որ շառավիղը հաշվարկվում էր օդային ուղիղ գծով, այն ընդգրկում էր Հայաստանի գրեթե ամբողջ տարածքը։ Այդ հիմքով ընկերությունը 2001 թվականին ստանձնել էր «Զվարթնոց», իսկ 2007 թվականին՝ «Շիրակ» օդանավակայանների կառավարումը։

Կոնցեսիոն պայմանագրի վերջին փոփոխություններով այդ դրույթը չեղարկվել է։ Նախարարության պարզաբանմամբ՝ փոփոխությունը հնարավորություն է տալիս Կապանի օդանավակայանի միջազգային կարգավիճակի հարցը քննարկել առանց այն կոնցեսիոներին հանձնելու։

Հիշեցվում է, որ «Սյունիք օդանավակայան» ՍՊԸ-ի բաժնետերերն են Զանգեզուրի պղնձամոլիբդենային կոմբինատը և կառավարության հիմնադրած «Սյունիքի մարզի զարգացման հիմնադրամը»։