«Կանաչ ուղի» ընթացակարգով ապրանքների հայտարարագրերի բացթողնման տեսակարար կշիռն աճել է 16.6 տոկոսային կետով

Վերանայվել են բոլոր գործող ռիսկի պրոֆիլները։

Պետական եկամուտների կոմիտեն հաղորդում է, որ արտաքին տնտեսական գործունեության մասնակիցների համար իրականացվող մաքսային բարեփոխումների շրջանակում արձանագրվել են գործնական արդյունքներ։ Դրանք պայմանավորված են 2025 թվականի սկզբից ներդրված թվային գործիքակազմերի կիրառմամբ, դրանց շարունակական արդիականացմամբ, ինչպես նաև մաքսային ռիսկերի կառավարման համակարգում կիրառվող ռիսկի պրոֆիլների վերանայմամբ։

Կոմիտեի ղեկավարության նախաձեռնությամբ վերանայվել են բոլոր գործող ռիսկի պրոֆիլները, որոնց զգալի մասը արդիականացվել է։ Բացի այդ, 2025 թվականի մայիսից ներդրվել է ռիսկերի կառավարման վրա հիմնված ապրանքների հայտարարագրերի ինքնաշխատ բացթողման համակարգը, որի արդյունքում մաքսային գործընթացում տնտեսվարողներն աշխատում են ամբողջությամբ ավտոմատացված և թվայնացված միջավայրում՝ առանց մարդկային գործոնի միջամտության։

ՊԵԿ մաքսային ռիսկերի կառավարման և վիճակագրության վարչության տվյալներով՝ եթե 2024 թվականին ապրանքների հայտարարագրերի ինքնաշխատ բացթողման մասնաբաժինը կազմել է 0.06 տոկոս, ապա 2025 թվականի նոյեմբերի դրությամբ այն հասել է 8 տոկոսի, իսկ դեկտեմբերին՝ 8.15 տոկոսի։

Տարվա ընթացքում իրականացվել են սակագնային, ոչ սակագնային և թիրախային հսկողության ռիսկի պրոֆիլների մշտադիտարկումներ, ինչպես նաև մակրո և միկրո մակարդակներում վերլուծություններ։ Նոր կարգաբերումների արդյունքում ապաակտիվացվել է գործող ռիսկի պրոֆիլների շուրջ 21 տոկոսը, որը կազմել է վերլուծության ենթարկված տվյալների մոտ 31 տոկոսը։

Արդյունքում աճել է «կանաչ ուղի» ընթացակարգով ապրանքների հայտարարագրերի բացթողնման տեսակարար կշիռը։ 2024 թվականի նոյեմբերի տվյալներով այն կազմել է 56.4 տոկոս, մինչդեռ 2025 թվականի նույն ժամանակահատվածում՝ 70.2 տոկոս։ Դեկտեմբերին ցուցանիշը հասել է մոտ 73 տոկոսի, ինչը 2024 թվականի համեմատ աճ է շուրջ 16.6 տոկոսային կետով։ Միաժամանակ նվազել է «դեղին» և «կարմիր ուղի» ընթացակարգերով հայտարարագրերի քանակը։