Ջրային պարեկները ապօրինի որսած սիգ են հայտնաբերել

Դեպքերի հանգամանքները պարզվում են։

Հունվարի 24-ին՝ ժամը 22:00-ի սահմաններում, Պարեկային ծառայության Գեղարքունիքի մարզի գումարտակի ջրային պարեկները Սևան–Մարտունի–Գետափ ավտոճանապարհի 7-րդ կիլոմետրին կանգնեցրել են «Օպել» մակնիշի ավտոմեքենա, որը վարել է Կարմիր գյուղի բնակիչ 43-ամյա տղամարդը։

Վարորդը մեքենայի բեռնախցիկում ներկայացրել է 391 հատ սիգ տեսակի ձուկ՝ ընդհանուր մոտ 182 կիլոգրամ քաշով։ Նրա խոսքով՝ ձուկը ձեռք է բերել անծանոթ անձից։

Դեպքից մոտ չորս ժամ անց նույն ծառայության ջրային պարեկները Երևան–Սևան–Իջևան ավտոճանապարհի 55-րդ կիլոմետրին կանգնեցրել են «Ֆորդ» մակնիշի մեքենա, որը վարել է Գավառ քաղաքի բնակիչ 53-ամյա տղամարդը։ Վերջինս ներկայացրել է շուրջ 100 կիլոգրամ քաշով 300 սիգ և նույնպես հայտնել է, որ այն գնել է անծանոթ անձից։

Երկու դեպքով էլ հայտնաբերված ձկնատեսակը փոխանցվել է Բնապահպանության և ընդերքի տեսչական մարմնի Գեղարքունիքի տարածքային բաժին։ Կազմված փաստաթղթերը փոխանցվել են քննչական բաժին։ Դեպքերի հանգամանքները պարզվում են։