Ջեյ Դի Վենսի այցով պայմանավորված՝ Երևանի որոշ փողոցներում կլինեն երթևեկության սահմանափակումներ

ՆԳՆ ոստիկանությունը հորդորում է վարորդներին նախապես պլանավորել երթուղիները։

Փետրվարի 9-ին և 10-ին Երևանում նախատեսված պետական արարողակարգային միջոցառումների մասնակիցների անվտանգությունն ապահովելու նպատակով մայրաքաղաքի մի շարք փողոցներում կսահմանափակվի տրանսպորտային միջոցների երթևեկությունը։ Այդ մասին տեղեկացնում են ՆԳՆ ոստիկանությունից։

Մասնավորապես, փետրվարի 9-ին՝ ժամը 17։00-ից մինչև 21։00-ն, երթևեկությունը կսահմանափակվի Բաղրամյան պողոտայում՝ Բաղրամյան պողոտա–Պռոշյան փողոց խաչմերուկից մինչև Բաղրամյան պողոտա–Մոսկովյան փողոց խաչմերուկ հատվածում։

Բացի այդ, փետրվարի 9-ին և 10-ին՝ տարբեր ժամերի, երթևեկության սահմանափակումներ կգործեն Աբովյան փողոցում՝ Աբովյան–Թումանյան փողոցների խաչմերուկից մինչև Հանրապետության հրապարակ, ինչպես նաև Պուշկինի փողոցում՝ Պուշկին–Կողբացի փողոցների խաչմերուկից մինչև Սախարովի հրապարակ։

Երթևեկության սահմանափակումները պայմանավորված են Ամերիկայի Միացյալ Նահանգների փոխնախագահ Ջեյ Դի Վենսի՝ տիկնոջ՝ Ուշա Վենսի հետ, Հայաստանի Հանրապետություն նախատեսված պաշտոնական այցով։

ՆԳՆ ոստիկանությունը հորդորում է վարորդներին նախապես պլանավորել երթուղիները և հետևել ճանապարհային նշաններին ու ոստիկանության ծառայողների ցուցումներին։