Ճապոնիան 5 մլրդ դոլար կհատկացնի բենզինի գների աճի դեմ պայքարին

Պաշտոնական որոշումը նախատեսվում է ընդունել մարտի 24-ին։

Ճապոնիայի կառավարությունը նախատեսում է շուրջ 810 միլիարդ իեն (մոտ 5.1 միլիարդ դոլար) հատկացնել բենզինի գների աճի դեմ պայքարելու նպատակով։

Ինչպես հաղորդում է Kyodo գործակալությունը, միջոցները կտրամադրվեն բյուջեի պահուստային ֆոնդից և կուղղվեն բենզինի մանրածախ գների սուբսիդավորման հիմնադրամի համալրմանը։

Պաշտոնական որոշումը նախատեսվում է ընդունել մարտի 24-ին։

Մարտի 16-ի դրությամբ Ճապոնիայում մեկ լիտր բենզինի գինը հասել է 190.8 իենի (մոտ 1.2 դոլար), ինչը պատմական առավելագույնն է 1990 թվականից ի վեր։

Գների աճը պայմանավորված է հում նավթի թանկացմամբ՝ Իրանի շուրջ իրավիճակի սրման ֆոնին։

Կառավարությունը արդեն մարտի 19-ից սկսել է գների զսպման միջոցառումներ՝ նպատակ ունենալով բենզինի գինը պահել մոտ 170 իենի մակարդակում։

Սուբսիդիաները կիրառվում են այդ օրվանից մատակարարվող վառելիքի խմբաքանակների վրա, և ակնկալվում է, որ մոտ մեկ-երկու շաբաթում շուկայում գները կկայունանան։

Բացի այդ, Ճապոնիան սկսել է օգտագործել իր նավթի ռազմավարական պաշարների մի մասը՝ շուկայում առաջարկը մեծացնելու նպատակով։

Նշվում է, որ վաճառքի է հանվելու այնպիսի ծավալ, որը կբավարարի երկրի պահանջարկը 45 օրվա ընթացքում, մինչդեռ ընդհանուր պաշարները բավարարում են մոտ ութ ամսվա կարիքները։