Հունվար-հունիսին ՀՀ–ից ռուսական կապիտալի էական արտահոսք է գրանցվել

2025 թվականի առաջին կիսամյակի տվյալներով՝ օտարերկրյա ուղղակի ներդրումների ծավալը Հայաստանում կազմել է 5 մլրդ 31 մլն դրամ, կամ գրեթե 13 մլն դոլար։

Այս ցուցանիշը նկատելի առաջընթաց է 2024-ի նույն ժամանակահատվածի համեմատ, երբ ՕՈՒՆ-ը եղել է բացասական՝ -21.9 մլրդ դրամի սահմաններում, ինչը նշանակում է, որ նախորդ տարի օտարերկրյա ներդրողները կապիտալ են դուրս բերել Հայաստանից՝ ներդրումների ծավալից ավել։ Այս մասին տեղեկացնում է Factor.am-ը։

2025–ի հունվար-հունիսին էական է ռուսական կապիտալի արտահոսքը մեր երկրից՝ գրեթե -27 մլրդ դրամ։ Այս միտումը սկսվել է 2022 թվականից հետո, մասնավորապես՝ 2024-ին ՌԴ ՕՈՒՆ-ի արտահոսքը ՀՀ-ից կազմել է -85․3 մլրդ դրամ, 2023-ին՝ -25․2 մլրդ դրամ։

Ըստ ՀՀ ՎԿ-ի՝ Հայաստանի արտաքին առևտրաշրջանառության ծավալը 2025 թվականի հունվար-հունիս ամիսներին նախորդ տարվա նույն ժամանակահատվածի համեմատ կրճատվել է 45 տոկոսով՝ կազմելով 9 մլրդ 668.6 մլն դոլար, որից մոտ 3.5 միլիարդը՝ ԵԱՏՄ, 88.4 միլիոնը՝ ԱՊՀ մյուս երկրների, 1.1 միլիարդը՝ ԵՄ և մոտավորապես 4.8 միլիարդը այլ պետությունների հետ:

Նույն ժամանակաշրջանում ԵԱՏՄ երկրների հետ Հայաստանի առևտուրը կրճատվել է 53.7 տոկոսով, մինչդեռ ԱՊՀ մյուս պետությունների հետ՝ ավելացել է 20.4, իսկ ԵՄ երկրների՝ 9.5 տոկոսով: Այլ երկրների հետ առևտրի ծավալը կրճատվել է 44.6 տոկոսով: