Հունվարի 8-ի կարևոր լուրերը

Ինչ է կատարվել Հայաստանում և աշխարհում։

ԷԼԵԿՏՐԱՄՈԲԻԼՆԵՐԻ ՄԱՔՍԱՏՈՒՐՔԻ ՎԵՐԱԴԱՐՁ


636 քաղաքացի 2025 թվականին հետ կստանա էլեկտրամոբիլի համար վճարված մաքսատուրքը։ ՀՀ էկոնոմիկայի նախարար Գևորգ Պապոյանի խոսքով՝ ՊԵԿ-ը մինչև հունվարի 10-ը կհրապարակի շահառուների ցանկը։


ՕՆԼԱՅՆ ԽԱՐԴԱԽՈՒԹՅԱՆ ՄԱՍԻՆ ԶԳՈՒՇԱՑՈՒՄ


Վարչապետ Նիկոլ Փաշինյանը հայտնել է օնլայն խարդախության դեպքի մասին, որի արդյունքում «Տելեգրամ»-ով գումար աշխատելու առաջարկի միջոցով քաղաքացուց հափշտակվել է շուրջ 2.4 մլն դրամ։ Վարչապետը կոչ է արել լինել զգոն և չտրվել խաբեություններին։


ՊԱՀԵՍՏԱԶՈՐԱՅԻՆՆԵՐԻ ՎԱՐԺԱԿԱՆ ՀԱՎԱՔՆԵՐ


2026 թվականին Հայաստանում կանցկացվեն պահեստազորի առաջին և երկրորդ կարգերում հաշվառված քաղաքացիների վարժական հավաքներ։ Դրանք նախատեսված են տարբեր փուլերով՝ փետրվարից մինչև դեկտեմբեր, և յուրաքանչյուր քաղաքացի կներգրավվի առավելագույնը 25 օր ժամկետով։


ԲԺՇԿԱԿԱՆ ՊԱՏՄՈՒԹՅՈՒՆՆԵՐԻ ՌԵԳԻՍՏՐ


Կառավարությունը սահմանել է քաղաքացիների բժշկական պատմությունների միասնական ռեգիստր՝ առողջության համընդհանուր ապահովագրության արդյունավետ գործարկման նպատակով։ Ռեգիստրը կգործի «ArMed» էլեկտրոնային առողջապահության համակարգում։


ՎԱՌԵԼԻՔԻ ՆԵՐՄՈՒԾՈՒՄ ԵՎ ԳՆԵՐ


Էկոնոմիկայի նախարար Գևորգ Պապոյանը հայտնել է, որ Հայաստան է ներմուծվում ոչ միայն պրեմիում, այլև ռեգուլյար բենզին և դիզել, որոնք շուկայականից 80–100 դրամով էժան կլինեն։ Էժան մրցակցությունը, նրա խոսքով, կօգնի նվազեցնել գները։


ԲՆԱԿԱՐԱՆԱՅԻՆ ԱՋԱԿՑՈՒԹՅՈՒՆ ՏԵՂԱՀԱՆՎԱԾՆԵՐԻՆ


Ղարաբաղից տեղահանված ընտանիքների համար տրամադրվում է բնակարանային աջակցություն հավաստագրերով։ Հունվարի 8-ի դրությամբ 4066 ընտանիք ստացել է հավաստագիր, որոնցից 1768-ն արդեն օգտվել է ծրագրից։


ՍՈՒՐ ՇՆՉԱՌԱԿԱՆ ՎԱՐԱԿՆԵՐԻ ՎԻՃԱԿԸ


Նոր տարվա առաջին շաբաթում Հայաստանում գրիպով և սուր շնչառական վարակներով պայմանավորված հիվանդացությունը նվազել է 2.3 անգամ։ Շարունակում են շրջանառվել գրիպ Ա (H3N2) ենթատեսակի հարուցիչները, իսկ պատվաստումների մակարդակը հասել է 92.7 տոկոսի։


ՀԱՅԱՍՏԱՆ–ԱԴՐԲԵՋԱՆ ԱՊՐԱՆՔԱՇՐՋԱՆԱՌՈՒԹՅՈՒՆ


Երևանն ու Բաքուն փոխանակել են ապրանքների հնարավոր ցանկեր՝ գնման և վաճառքի ուղղությամբ։ Վարչապետ Նիկոլ Փաշինյանի խոսքով՝ գործընթացը դեռ ուսումնասիրության փուլում է, և քննարկումները շարունակվում են։