Հունվարի 5–11-ը ՀՀ-ում գրանցվել է 689 արտակարգ և կենցաղային դեպք․ 31 տուժած, 6 զոհ

Եղանակային պայմանների և այլ գործոնների հետևանքով արձանագրվել է տրանսպորտային միջոցների 141 արգելափակման դեպք։

ՀՀ ներքին գործերի նախարարության Փրկարար ծառայության ճգնաժամային կառավարման ազգային կենտրոնում հունվարի 5-ից 11-ն ընկած ժամանակահատվածում գրանցվել է ընդհանուր առմամբ 689 դեպք, որոնցից 112-ը՝ արտակարգ։

Դեպքերի կառուցվածքում առավել հաճախ արձանագրվել են հրդեհներ՝ 61 դեպք, ճանապարհատրանսպորտային պատահարներ՝ 16, մերկասառույցի դեպքեր՝ 17, ինչպես նաև հրդեհի ծագման սպառնալիքներ՝ 26 և հրդեհի կեղծ կանչեր՝ 32։ Կենցաղային բնույթի կանչերի թիվը կազմել է 345։

Արձանագրվել են նաև մի շարք եզակի դեպքեր՝ պայթյուն, քարաթափում, ինքնասպանության փորձ, որոնողափրկարարական միջադեպ, օձի նկատում՝ յուրաքանչյուրն 1 դեպք։ Կենսաապահովման համակարգերում վթարների, ձնաբքի և զինամթերքի հայտնաբերման դեպքերը կազմել են 2-ական։ Փլուզման և թունավորման դեպքերը՝ 4-ական։

Եղանակային պայմանների և այլ գործոնների հետևանքով արձանագրվել է տրանսպորտային միջոցների 141 արգելափակման դեպք։ Փրկարարները օգնություն են ցուցաբերել 299 քաղաքացու և անվտանգ տարածք տեղափոխել ավտոճանապարհներին արգելափակված 158 տրանսպորտային միջոց։

Նախորդ շաբաթվա ընթացքում տարբեր միջադեպերի հետևանքով տուժել է 31 մարդ, իսկ 6 քաղաքացի մահացել է։ Փրկարարական գործողությունների արդյունքում փրկվել է 2 մարդ։