Հունվարի 28-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում

ՏԵՂԱԿԱՆ ԼՈՒՐԵՐ

Հայաստանն ու Ադրբեջանը պայմանավորվել են Ադրբեջանի տարածքով հեղուկ գազի և բիտումի երկաթուղային փոխադրման մասին
Հայաստանի և Ադրբեջանի միջև ձեռք է բերվել համաձայնություն՝ Ադրբեջանի տարածքով հեղուկ գազի և բիտումի երկաթուղային փոխադրման վերաբերյալ։ Այս մասին հայտնել է ՀՀ էկոնոմիկայի նախարար Գևորգ Պապոյանը՝ նշելով, որ հայ գործարարներն արդեն կարող են օգտվել այդ հնարավորությունից։

2025 թ.-ի 3-րդ եռամսյակում ՀՀ-ում թողարկվել է 2,721,656 բանկային քարտ
2025 թվականի երրորդ եռամսյակում Հայաստանում թողարկվել է 2,721,656 բանկային քարտ։ Դրանցից 1,066,149-ը՝ MasterCard, 770,302-ը՝ Arca, 530,947-ը՝ Visa, իսկ 354,258-ը՝ այլ քարտեր։ Տվյալները ներկայացրել է ՀՀ ԿԲ-ն։

Պետությունը կոնյակ արտադրողներին արտոնյալ պայմաններով վարկ կտրամադրի
Էկոնոմիկայի նախարարությունը հանրային քննարկման է ներկայացրել կոնյակ արտադրող տնտեսվարողների աջակցության ծրագիրը։ Նախագծով նախատեսվում է 200-ից մինչև 1500 մլն դրամ արտոնյալ վարկերի տրամադրում՝ աշխատավարձերի, հարկերի և պարտադիր վճարումների կատարման նպատակով։

ՀՀ ԱԳ նախարարը ստորագրել է արհեստական բանականության կիրառման ոլորտում մարդու իրավունքների պաշտպանության մասին ԵԽ կոնվենցիան
ՀՀ արտաքին գործերի նախարար Արարատ Միրզոյանը ստորագրել է Եվրոպայի խորհրդի շրջանակային կոնվենցիան՝ ուղղված արհեստական բանականության կիրառման ոլորտում մարդու իրավունքների, ժողովրդավարության և օրենքի գերակայության պաշտպանությանն ու միջազգային համագործակցության խորացմանը։

2025թ.-ի հունվար-նոյեմբերին ՀՀ բանկային համակարգում մուտքերը կազմել են 10.75 տրիլիոն դրամ
Վիճակագրական կոմիտեի տվյալներով՝ բանկային համակարգում դրամարկղային մուտքերը նվազել են 1.4%-ով և կազմել 10.75 տրիլիոն դրամ, իսկ ելքերը՝ 10.77 տրիլիոն դրամ՝ ևս 1.4% նվազումով։

ՄԻՋԱԶԳԱՅԻՆ ԼՈՒՐԵՐ

Ղազախստանը կորցրել է 3.8 մլն տոննա նավթ
Կասպյան խողովակաշարային կոնսորցիումի դեմ գրոհների հետևանքով Ղազախստանը կորցրել է 3.8 մլն տոննա նավթ։ Նշված երթուղին հանդիսանում է ղազախական նավթի հիմնական արտահանման ուղին։

Ռիալի փոխարժեքն Իրանում բողոքների ֆոնին հասել է ռեկորդային ցածր մակարդակի
Իրանական ռիալը բողոքի լայնածավալ ակցիաների ֆոնին հասել է պատմական նվազագույն արժեքի։ Տարիների ընթացքում արժեզրկումը պայմանավորված է պատժամիջոցներով և տնտեսական խնդիրներով։

ԱՄՆ-ը կարող է բախվել մասնակի շաթդաունի արդեն այս շաբաթվա վերջին
ԱՄՆ-ում առկա է մասնակի շաթդաունի վտանգ՝ պայմանավորված դաշնային բյուջեի շուրջ Կոնգրեսում շարունակվող տարաձայնություններով, մասնավորապես՝ ներքին անվտանգության նախարարության ֆինանսավորման հարցում։

Մեքսիկան դադարեցրել է Կուբա նավթի մատակարարումները
Մեքսիկայի նախագահ Կլաուդիա Շեյնբաումը հայտարարել է Կուբա նավթի մատակարարումների ժամանակավոր դադարեցման մասին՝ շեշտելով, որ որոշումը ինքնիշխան է և չի կայացվել արտաքին ճնշման ներքո։