Հունվարի 27-ի կարևոր լուրերը

Ինչ է կատարվել Հայաստանում և աշխարհում

ԻՐԱՆԻ ԿՈՇՏ ՆԱԽԱԶԳՈՒՇԱՑՈՒՄԸ ԱՄՆ-ԻՆ ԵՎ ԻՍՐԱՅԵԼԻՆ

Իրանի արտգործնախարարության խոսնակ Էսմայիլ Բաղային հայտարարել է, որ ցանկացած ագրեսիա կարժանանա համապարփակ և ջախջախիչ պատասխանի։ Նա նշել է, որ Իրանը երկար տարիներ ենթարկվում է պարտադրված «հիբրիդային պատերազմի» և ընդգծել, որ տարածաշրջանում ցանկացած անկայունացում վարակիչ բնույթ ունի՝ կոչ անելով հարևան երկրներին հստակ դիրքորոշում ցուցաբերել արտաքին սպառնալիքների դեմ։

ՀԱՅՐԵՆԻՔԻ ՊԱՇՏՊԱՆՈՒԹՅԱՆ ՀԱՄԱՐ ԶՈՀՎԱԾՆԵՐԻ ՀԻՇԱՏԱԿԻ ՕՐ

Հունվարի 27-ին Հայաստանում առաջին անգամ նշվել է Հայրենիքի պաշտպանության համար զոհվածների հիշատակի օրը։ Նիկոլ Փաշինյանը, Ալեն Սիմոնյանը, Վահագն Խաչատուրյանը և այլ բարձրաստիճան պաշտոնյաներ այցելել են Եռաբլուր և հարգանքի տուրք մատուցել հայրենիքի պաշտպանության համար զոհվածների հիշատակին։

ԹՐԱՄՓԸ՝ ԻՐԱՆԻ ՇՐՋԱԿԱՅՈՒՄ ՌԱԶՄԱԿԱՆ ՆԵՐԿԱՅՈՒԹՅԱՆ ՄԱՍԻՆ

ԱՄՆ նախագահ Դոնալդ Թրամփը հայտարարել է, որ Իրանի հետ իրավիճակը փոփոխական է, քանի որ տարածաշրջան է ուղարկվել մեծ նավատորմ։ Նա նշել է, որ Թեհրանը ցանկանում է գործարք կնքել և բազմիցս կապ է հաստատել Վաշինգտոնի հետ՝ ընդգծելով, որ դիվանագիտությունը դեռ մնում է տարբերակ։

ՆԱՏՕ-Ի ԴԻՐՔՈՐՈՇՈՒՄԸ ԻՐԱՆԻ ՀԱՐՑՈՒՄ

ՆԱՏՕ-ի գլխավոր քարտուղար Մարկ Ռյուտեն հայտարարել է, որ դաշինքը չի միջամտի Իրանում տեղի ունեցող գործընթացներին՝ դրանք չդիտարկելով ՆԱՏՕ-ի պատասխանատվության շրջանակում։ Նրա խոսքով՝ դաշինքը կենտրոնացած է եվրոատլանտյան անվտանգության և ռուսական սպառնալիքի վրա, միաժամանակ հետևելով Իրանի համագործակցությանը Ռուսաստանի, Չինաստանի և Հյուսիսային Կորեայի հետ։

ԹՐԱՄՓԸ ԲԱՐՁՐԱՑՆՈՒՄ Է ՄԱՔՍԱՏՈՒՐՔԵՐԸ ՀԱՐԱՎԱՅԻՆ ԿՈՐԵԱՅԻ ՀԱՄԱՐ

Դոնալդ Թրամփը հայտարարել է, որ Հարավային Կորեայի օրենսդիր մարմինը չի հաստատել ԱՄՆ-ի հետ կնքված առևտրային համաձայնագիրը, ինչի հետևանքով ավտոմեքենաների, փայտանյութի, դեղագործական և այլ ոլորտների մաքսատուրքերը բարձրացվում են 15-ից մինչև 25 տոկոս։

ՃԱՊՈՆԻԱՅՈՒՄ ՁՆԱԲՔ ԵՎ ԶՈՀԵՐ

Ճապոնիայի Հոկայդո կղզում առատ ձյան հետևանքով դադարեցվել է մոտ հազար գնացքի երթևեկություն, զոհվել է 16 մարդ։ Ավելի քան 7000 մարդ գիշերել է Նոր Չիտոսե օդանավակայանում, իսկ մեկ օրում տեղացած ձյան շերտը հասել է 54 սանտիմետրի։

ԻՐԱՆՈՒՄ ԲՈՂՈՔՆԵՐԻ ԶՈՀԵՐԻ ԹԻՎԸ

HRANA-ի տվյալներով՝ Իրանում տնտեսական և քաղաքական բողոքի ցույցերի զոհերի թիվը հասել է 6,126-ի, որոնցից ավելի քան 5000-ը ցուցարարներ են։ Գրանցվել է 651 միջադեպ՝ 31 նահանգի շուրջ 200 քաղաքներում։

ԱՄՆ-ՈՒՄ ՁՄԵՌԱՅԻՆ ՓՈԹՈՐԻԿՆԵՐԻ ՀԵՏԵՎԱՆՔՆԵՐԸ

Միացյալ Նահանգներում ձմեռային փոթորկի հետևանքով մահացել է առնվազն 28 մարդ։ 30 սմ ձյունը կաթվածահար է արել երթևեկությունը, չեղարկվել են հազարավոր չվերթներ, իսկ 25 նահանգում հայտարարվել է արտակարգ դրություն։

ՄՈՍԿՎԱՅՈՒՄ ԵՂԱՆԱԿԱՅԻՆ ՎՏԱՆԳ

Մոսկվայում գրանցվել է հզոր ձնաբքի ցիկլոն, և մինչև հունվարի 29-ը սահմանվել է եղանակային վտանգի նարնջագույն մակարդակ։ Օդանավակայաններում հետաձգվել է ավելի քան 40 չվերթ։

ԲԱՆԱԿՈՒՄ ԻՆՔՆԱՍՊԱՆՈՒԹՅՈՒՆՆԵՐԻ ԹԵՄԱՆ

Պաշտպանության փոխնախարար Արման Սարգսյանը Եռաբլուրում հայտարարել է, որ բանակում ինքնասպանության դեպքերի աճի մասին տարածվող կարծիքները չեն համապատասխանում իրականությանը և պահանջում են ճշգրիտ վերլուծություն։

ԷԼԵԿՏՐԱԷՆԵՐԳԻԱՅԻ ՎՃԱՐՈՒՄՆԵՐԻ ՏԱՐԲԵՐՈՒԹՅՈՒՆՆԵՐ

Քաղաքացիների կողմից արձանագրվող էլեկտրաէներգիայի վճարումների աճը, ՀԷՑ-ի պարզաբանմամբ, պայմանավորված է եղանակային գործոններով և դեկտեմբերին ավելացած սպառմամբ։ Միևնույն ժամանակ չի բացառվում ոչ տեխնիկական կամ հնարավոր միտումնավոր միջամտության վարկածը։