Հունվարի 15-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Վարձատրության նոր համակարգ՝ պետական պաշտոնյաների համար
Ներդրվել է կատարողականի վրա հիմնված վարձատրության նոր համակարգ, որի նպատակը պետական համակարգի արդյունավետության բարձրացումն ու կոռուպցիոն ռիսկերի նվազեցումն է։ Վարչապետ Նիկոլ Փաշինյանի խոսքով՝ առաջիկայում Հայաստան են սպասվում մեծ ներդրումներ, և պետական համակարգը պետք է պատրաստ լինի այդ պայմաններում աշխատելուն։ Նա հայտնել է, որ նոր համակարգով ամսական ստացել է մոտ 1,5 մլն դրամ հավելավճար։

Հայաստանից մշակութային արժեքների արտահանման համար պետական նոր տուրք կսահմանվի
Կառավարությունը նախատեսում է սահմանել պետական նոր տուրք մշակութային արժեքների արտահանման համար։ Տուրքերի տեսակները կհամապատասխանեցվեն ԵԱՏՄ կարգավորումներին՝ միաժամանակ բարձրացնելով վարչարարության արդյունավետությունը և հստակ տարանջատելով մաքսային ռեժիմները։

Վերջին մեկ տարում Հայաստանից ծաղկի արտահանումն աճել է մոտ 30 տոկոսով
Էկոնոմիկայի նախարար Գևորգ Պապոյանի խոսքով՝ վերջին մեկ տարում ծաղկի արտահանումը աճել է շուրջ 30 տոկոսով։ Աճ է գրանցվել նաև պղպեղի արտահանման ոլորտում՝ մոտ 10 տոկոսով։

2026-ին Հայաստանի տնտեսության համար կանխատեսվում է 4,9 տոկոս աճ
Համաշխարհային բանկի կանխատեսմամբ՝ 2026 թվականին Հայաստանի տնտեսությունը կաճի 4,9 տոկոսով։ Միևնույն ժամանակ նշվում է, որ տարածաշրջանում հնարավոր է աճի որոշակի դանդաղում՝ գլոբալ և տարածաշրջանային գործոնների ազդեցությամբ։

2025թ. հունվար–նոյեմբերին Հայաստանում արտադրվել է ավելի քան 63 հազար տոննա միս
Նշված ժամանակահատվածում Հայաստանում արտադրվել է 63,047.9 տոննա միս։ Երշիկեղենի արտադրությունն աճել է 7.3 տոկոսով, իսկ մսի կիսապատրաստվածքներինը՝ 56 տոկոսով։

ՄԻՋԱԶԳԱՅԻՆ ԼՈՒՐԵՐ

Եվրահանձնաժողովը Կիևի համար նախատեսված 90 մլրդ եվրոյի վարկի մեծ մասը կուղղի ռազմական կարիքներին
Ուկրաինայի համար նախատեսված 90 միլիարդ եվրո վարկից 60 միլիարդը նախատեսվում է ուղղել ռազմական օգնությանը, իսկ 30 միլիարդը՝ բյուջետային աջակցությանը։ Զենքի գնումների ժամանակ առաջնահերթությունը կտրվի եվրոպական արտադրողներին։

Չինաստանը բնական գազի ներմուծման նոր պատմական ռեկորդ է սահմանել
2025 թվականի նոյեմբերին Չինաստանը ներմուծել է 17.488 մլրդ խմ բնական գազ, ինչը 16 տոկոսով ավելի է նախորդ տարվա նույն ցուցանիշից։ Աճը հիմնականում պայմանավորված է Ռուսաստանի մատակարարումների ավելացմամբ։

Ուկրաինայում էներգետիկ ոլորտում կսահմանվի արտակարգ դրություն
Ռուսական հարվածների հետևանքով էներգետիկ ենթակառուցվածքներին հասցված վնասների պատճառով Ուկրաինայի իշխանությունները պատրաստվում են հայտարարել արտակարգ դրություն էներգետիկ ոլորտում՝ արագ վերականգնման նպատակով։

Եվրախորհրդարանը հետաձգել է ԱՄՆ-ի հետ առևտրային գործարքի վերաբերյալ որոշումը
Եվրախորհրդարանը հետաձգել է ԱՄՆ-ի հետ առևտրային համաձայնագրի վերաբերյալ քվեարկությունը՝ Դոնալդ Թրամփի կողմից Գրենլանդիայի վերաբերյալ հնչեցված սպառնալիքների ֆոնին։ Որոշ պատգամավորներ հանդես են եկել մաքսատուրքերի վերացման գործընթացը սառեցնելու օգտին։