Հունվարի 14-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Մեր տարածաշրջան ներհոսելու են մեծ ներդրումներ և մեծ փողեր․ Փաշինյան
Վարչապետ Նիկոլ Փաշինյանի խոսքով՝ տարածաշրջանում կայունության ձևավորումն արդեն ճանապարհ է բացում խոշոր ներդրումների և ֆինանսական հոսքերի համար։ Վարչապետը, կարևորելով TRIPP նախագիծը, ընդգծել է, որ այս գործընթացները կանաչ լույս են վառում մեծ կապիտալի ներհոսքի համար, ինչը Հայաստանի համար ստեղծում է դրական տնտեսական հեռանկարներ։

640 միլիոն դրամ՝ Փրկարար ծառայության նոր մեքենաների համար
Պետական բյուջեից շուրջ 640 միլիոն դրամ է հատկացվել Փրկարար ծառայությանը՝ նոր հրշեջ-փրկարարական և արագ արձագանքման մեքենաների ձեռքբերման նպատակով։ 2025 թվականին ծառայությունը ստացել է 18 նոր մեքենա, որոնք արդեն բաշխվել են տարածքային ստորաբաժանումներին։

2025թ. հոկտեմբերի 1-ից դեկտեմբերի 31-ը ՀԴՄ-ի կիրառման խախտումների համար առաջադրվել է 60.8 մլն դրամ տուգանք
ՊԵԿ-ի հսկողական աշխատանքների արդյունքում խոշոր հարկ վճարողների մոտ հայտնաբերվել է 31 չգրանցված աշխատող 6 կազմակերպությունում և արձանագրվել են ՀԴՄ-ի կիրառման խախտումներ 13 կազմակերպությունում, ինչի համար առաջադրվել է ընդհանուր առմամբ շուրջ 60.8 մլն դրամ տուգանք։

Հայաստանն ու Իրանը տարանցիկ փոխադրումների ոլորտում համագործակցության լուրջ ներուժ ունեն․ ՀՀ-ում Իրանի դեսպան
ՀՀ-ում Իրանի դեսպան Խալիլ Շիրգոլամին նշել է, որ Հայաստանը և Իրանը մեծ ներուժ ունեն տարանցիկ փոխադրումների, ենթակառուցվածքների, էներգետիկայի և զբոսաշրջության ոլորտներում համագործակցությունը խորացնելու համար՝ ընդգծելով երկաթուղային կապի և ազատ տնտեսական գոտիների կարևորությունը։

Կառուցապատողները տուգանքներ կվճարեն գնորդներին՝ ուշացումների համար
Պատրաստվում են օրենսդրական փոփոխություններ, որոնց համաձայն կառուցապատողները պարտավոր կլինեն տուգանք վճարել գնորդներին, եթե շինարարությունը չավարտեն պայմանագրով սահմանված ժամկետում։ Նախատեսվում է նաև խստացնել շինարարական նախագծերի թափանցիկությունը։

ՄԻՋԱԶԳԱՅԻՆ ԼՈՒՐԵՐ

ԱՄԷ-ն և Չինաստանը գլխավորում են այն երկրների ցանկը, որոնց սպառնում են Թրամփի հակաիրանական մաքսատուրքերը
Չինաստանն ու ԱՄԷ-ն, լինելով Իրանի խոշորագույն առևտրային գործընկերներ, հայտնվել են այն երկրների առաջին հորիզոնականներում, որոնց կարող է սպառնալ ԱՄՆ նախագահ Դոնալդ Թրամփի հայտարարած 25% մաքսատուրքը։

2025-ին տարերային աղետների պատճառով համաշխարհային տնտեսության վնասը կազմել է 224 մլրդ դոլար
2025 թվականին տարերային աղետների հետևանքով համաշխարհային տնտեսության ընդհանուր վնասը կազմել է 224 մլրդ դոլար, ինչը մոտ 40%-ով պակաս է նախորդ տարվա ցուցանիշից։ Ամենախոշոր վնասը գրանցվել է Կալիֆոռնիայի անտառային հրդեհների հետևանքով։

Ռուսաստանի միջազգային պահուստները մեկ շաբաթում աճել են 11 միլիարդ դոլարով
Ռուսաստանի բանկի տվյալներով՝ դեկտեմբերի 26-ի դրությամբ երկրի միջազգային պահուստները կազմել են 763.9 մլրդ դոլար՝ մեկ շաբաթում աճելով 11.3 մլրդ դոլարով՝ հիմնականում ակտիվների դրական վերագնահատման հաշվին։

Համաշխարհային բանկը բարելավել է համաշխարհային տնտեսական աճի կանխատեսումը
Համաշխարհային բանկը բարձրացրել է 2026 թվականի համաշխարհային տնտեսական աճի կանխատեսումը մինչև 2.6%՝ դա պայմանավորելով միջազգային առևտրի ակտիվացմամբ։