Հունվարի 13-ի կարևոր լուրերը

Ինչ է կատարվել Հայաստանում և աշխարհում։

ԱՄՆ ՔԱՂԱՔԱՑԻՆԵՐԻՆ՝ ԻՐԱՆԸ ԼՔԵԼՈՒ ԿՈՉ

ԱՄՆ պետդեպարտամենտը կոչ է արել իր քաղաքացիներին լքել Իրանը զանգվածային բողոքի ակցիաների ֆոնին։ Համապատասխան հայտարարությունը տեղադրվել է Թեհրանում ԱՄՆ վիրտուալ դեսպանատան կայքում։ Երկքաղաքացիություն ունեցող ԱՄՆ քաղաքացիներին խորհուրդ է տրվում մեկնելու համար օգտագործել իրանական անձնագիր, քանի որ Իրանը չի ճանաչում ամերիկյան քաղաքացիությունը։ ԱՄՆ-ն դիվանագիտական և հյուպատոսական հարաբերություններ չունի Իրանի հետ, իսկ Թեհրանում ԱՄՆ շահերը ներկայացնում է Շվեյցարիան։

ԱՄՆ-Ի ԿՈՇՏ ՏՆՏԵՍԱԿԱՆ ՔԱՅԼԸ ԻՐԱՆԻ ԴԵՄ

Դոնալդ Թրամփը հայտարարել է, որ Միացյալ Նահանգները 25 տոկոս մաքսատուրք կսահմանի Իրանի հետ բիզնեսով զբաղվող բոլոր երկրների համար։ TruthSocial-ում արված գրառման համաձայն՝ Իրանի հետ առևտրական հարաբերություններ ունեցող ցանկացած երկիր 25 տոկոս մաքսատուրք կվճարի ԱՄՆ-ի հետ բոլոր գործարքների համար։ Թրամփը շեշտել է, որ որոշումն ուժի մեջ է մտնում անմիջապես և վերանայման ենթակա չէ։

ՄԱԿՐՈՆԸ՝ ԻՐԱՆՑԻ ՑՈՒՑԱՐԱՐՆԵՐԻ ԿՈՂՔԻՆ

Ֆրանսիայի նախագահ Էմանուել Մակրոնը աջակցություն է հայտնել Իրանում բողոքի ցույցերին մասնակցող քաղաքացիներին։ Նա հայտարարել է, որ Ֆրանսիան կանգնած է Իրանում հիմնարար ազատությունների պաշտպանների կողքին և դատապարտում է կառավարության կողմից կանանց և տղամարդկանց նկատմամբ կիրառվող լայնածավալ բռնությունը։

ԱՐՔԱ ՔԱՐՏԵՐ ԵՎ ԱՆՁՆԱԿԱՆ ՏՎՅԱԼՆԵՐ

«Արմենիան Քարդ» ՓԲԸ-ն հայտնել է, որ ԱՐՔԱ քարտերով անկանխիկ վճարումների դեպքում գործող 2 տոկոս հետվճարի ծրագրի շրջանակում ՀՀ ֆինանսների նախարարությանը չի փոխանցելու քաղաքացիների իրականացրած գործարքների վերաբերյալ անձնական տվյալներ կամ բանկային գաղտնիք հանդիսացող որևէ տեղեկություն։ Ֆինանսների նախարարությունը քաղաքացիներին կոչ է արել հետևել բացառապես պաշտոնական աղբյուրներից ստացվող տեղեկատվությանը։

ԱՐԱՐԱՏ ՄԻՐԶՈՅԱՆԻ ԵՎ ՄԱՐԿՈ ՌՈՒԲԻՈՅԻ ՀԱՆԴԻՊՈՒՄԸ

ՀՀ արտաքին գործերի նախարար Արարատ Միրզոյանը ԱՄՆ-ում հանդիպում կունենա ԱՄՆ պետքարտուղար Մարկո Ռուբիոյի հետ։ Տեղեկությունը հրապարակվել է ԱՄՆ պետքարտուղարության պաշտոնական կայքում։ Հանդիպումը նախատեսված է տեղական ժամանակով ժամը 21:00-ին։

ԻՐԱՆԸ՝ ԱՄՆ-Ի ՀԵՏ ԲԱՆԱԿՑԵԼՈՒ ՊԱՏՐԱՍՏԱԿԱՄՈՒԹՅԱՆ ՄԱՍԻՆ

Իրանի արտաքին գործերի նախարար Աբբաս Արաղչին հայտարարել է, որ Թեհրանը պատրաստ է բանակցել ԱՄՆ-ի հետ միայն հավասարության և փոխադարձ հարգանքի հիման վրա։ Նրա խոսքով՝ Իրանը չի ընդունի որևէ թելադրանք և ակնկալում է ազնիվ ու լուրջ մոտեցում բանակցային գործընթացում։

ԶՈՀԵՐԻ ԹԻՎԸ ԻՐԱՆՈՒՄ ՇԱՐՈՒՆԱԿՈՒՄ Է ԱՃԵԼ

«Իրանի մարդու իրավունքներ» կենտրոնի տվյալներով՝ Իրանում շարունակվող համազգային բողոքի ցույցերի ընթացքում անվտանգության ուժերի կրակի հետևանքով զոհերի թիվը հասել է առնվազն 648-ի։ Միևնույն ժամանակ, չհաստատված աղբյուրները նշում են, որ զոհերի թիվը կարող է հասնել մի քանի հազարների, որոշ գնահատականներով՝ նույնիսկ ավելի քան 6000-ի։

ԿԱՄՉԱՏԿԱՆ՝ ՁՅԱՆ ՏԱԿ

Կամչատկայի երկրամասում առատ ձյան և ուժգին քամու պատճառով դադարեցվել է ավիահաղորդակցությունը, չեղարկվել են ավտոբուսային ուղերթերը և փակվել առանցքային մայրուղիները։ Դպրոցականներն անցել են հեռավար ուսուցման, լեռնային շրջաններում հայտարարվել է ձնահյուսի վտանգ։ Շենքերի մուտքերը արգելափակված են, և բնակիչները բահերով փորձում են ճանապարհ բացել։