Հունվարի 12-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Հայաստանում 2026 և 2027 թվականներին իրական ՀՆԱ-ի աճը կանխատեսվում է 4,8 տոկոս
ՄԱԿ-ի կանխատեսմամբ՝ Հայաստանում իրական ՀՆԱ-ի աճը թե՛ 2026, թե՛ 2027 թվականներին կկազմի 4,8 տոկոս։ Տարածաշրջանի երկրներից Վրաստանում այդ ցուցանիշը կանխատեսվում է 5,4 տոկոս՝ 2026 թվականին և 5 տոկոս՝ 2027 թվականին։

Հայաստանը 37-րդ հորիզոնականում է Համաշխարհային բանկի Business Ready բիզնես վարկանիշում
Համաշխարհային բանկի Business Ready հարթակում Հայաստանը ստացել է 66,7 միավոր և զբաղեցրել 37-րդ հորիզոնականը 101 երկրից։ Համեմատության համար՝ Վրաստանը 75,1 միավորով 4-րդն է, իսկ Ադրբեջանը՝ 66 միավորով 38-րդը։

Հայաստանը ներառվել է The New York Times-ի զբոսաշրջային ցանկում
Հայաստանը The New York Times պարբերականի կողմից ներառվել է աշխարհի լավագույն զբոսաշրջային ուղղությունների ցանկում՝ զբաղեցնելով 20-րդ տեղը։ Զբոսաշրջության կոմիտեից նշել են, որ սա հաստատում է Հայաստանի գրավչությունը՝ իր մշակույթով, գինու ավանդույթներով և բնությամբ։

2025 թվականին Հարավկովկասյան երկաթուղու գնացքներից օգտվել է 510 հազար ուղևոր
2025 թվականին «Հարավկովկասյան երկաթուղի» ընկերության գնացքներով տեղափոխվել է 510 հազար ուղևոր, որոնցից մոտ 42 հազարը՝ միջազգային, իսկ 468 հազարը՝ տեղական երթուղիներում։

2026-ին Արցախից բռնի տեղահանված ընտանիքներում ծնված երեխաները կներառվեն բնակարանային աջակցության ծրագրում
2026 թվականից Արցախից բռնի տեղահանված ընտանիքներում ծնված երեխաները ևս կդառնան բնակարանային աջակցության պետական ծրագրի շահառու՝ ստանալով 3-ից 5 միլիոն դրամ աջակցություն՝ բնակության վայրից կախված։

ՄԻՋԱԶԳԱՅԻՆ ԼՈՒՐԵՐ

Ռուսաստանի նավթային եկամուտները հասել են նվազագույն մակարդակին
Bloomberg-ի տվյալներով՝ Ուկրաինայում պատերազմի սկսվելուց ի վեր Ռուսաստանի նավթային եկամուտները հասել են նվազագույն մակարդակին՝ նավթի արտահանման և գների շարունակական անկման պայմաններում։

Գազպրոմը 2026-ին Չինաստան գազի օրական մատակարարումների ռեկորդ է գրանցել
«Գազպրոմ»-ը հայտնել է, որ 2026 թվականի հունվարի 10-ին «Սիբիրի ուժը» գազամուղով Չինաստան օրական գազի մատակարարումները սահմանել են առաջին ռեկորդը՝ ավելի քան 100 մլն խմ ծավալով։

Չինաստանում է գտնվում օգտակար հանածոների համաշխարհային պաշարի շուրջ 48 տոկոսը
Հազվագյուտ օգտակար հանածոների համաշխարհային պաշարների շուրջ 48 տոկոսը կենտրոնացված է Չինաստանում, ինչն ուժեղացնում է այլ երկրների կախվածությունը ներմուծումից։

Թրամփը առաջարկում է կրեդիտ քարտերի տոկոսադրույքները սահմանափակել 10 տոկոսով
ԱՄՆ նախագահ Դոնալդ Թրամփը առաջարկել է մեկ տարվա ընթացքում կրեդիտ քարտերի տոկոսադրույքները սահմանափակել առավելագույնը 10 տոկոսով՝ նպատակ ունենալով թեթևացնել սպառողների ֆինանսական բեռը։