Իսրայելը ցամաքային գործողություն է սկսել Գազայում

Իսրայելը սեպտեմբերի 16-ի գիշերը ցամաքային գործողություն է սկսել Գազայում:

Այդ մասին գրել է Axios-ը՝ հղում անելով աղբյուրներին։

Հրատարակության աղբյուրները հայտնել են, որ ամերիկյան կողմը չի կանգնեցրել Իսրայելին։ Սպիտակ տունը մեկ պայման ունի՝ ամբողջ պատասխանատվությունը կրելու է Իսրայելի վարչապետ Բենիամին Նեթանյահուն:

Հարձակումից առաջ իսրայելական բանակն ակտիվացրել է ավիահարվածները և կոչ է արել քաղաքի բնակիչներին տարհանվել դեպի հարավ՝ մարդասիրական գոտիներ։ Իսրայելը 20 րոպեում 37 հարված է հասցրել, այդ թվում՝ ուղղաթիռներից, ինչպես նաև օգտագործել է անօդաչու թռչող սարքեր և հրետանի:

Axios-ը նշել է, որ Իսրայելի անվտանգության բարձրաստիճան պաշտոնյաները, այդ թվում՝ աշխատակազմի ղեկավարը և Մոսադի ղեկավարը, խորհուրդ են տվել Նեթանյահուին չսկսել գործողությունը։

Իսրայելի վարչապետը գործողության մեկնարկից մի քանի ժամ առաջ հանդիպել է ԱՄՆ պետքարտուղար Մարկո Ռուբիոյի հետ։ Վերջինս հայտարարել է, որ Թրամփի վարչակազմը աջակցում է նրա գործողություններին, սակայն պայմանով, որ դրանք արագ իրականացվեն, հավելել է հրատարակությունը։