Իսպանիան դուրս կգա՞ ՆԱՏՕ-ից․ քննարկում՝ Պենտագոնում

Առաջարկները ներկայացված են ներքին շրջանառության մեջ գտնվող գրության մեջ։

Պենտագոնի ներսում քննարկվում են ՆԱՏՕ-ի որոշ դաշնակիցների նկատմամբ հնարավոր սահմանափակումների տարբերակներ՝ Իրանի շուրջ ռազմական գործողությունների համատեքստում ԱՄՆ-ին աջակցություն չցուցաբերելու պատճառով։

Reuters գործակալության փոխանցմամբ՝ այդ առաջարկները ներկայացված են ներքին շրջանառության մեջ գտնվող գրության մեջ, որը տարածվել է բարձրաստիճան աշխատակիցների շրջանում։ Գործակալությունը չի հստակեցնում դրա հեղինակին։

Նշվում է, որ քննարկվող տարբերակներից մեկը Իսպանիայի ՆԱՏՕ անդամակցության կասեցման հարցն է։ Ըստ աղբյուրի՝ այս քայլը կարող է ունենալ սահմանափակ գործնական, բայց զգալի խորհրդանշական ազդեցություն։

Մեկ այլ տարբերակ վերաբերում է ԱՄՆ-ի դիրքորոշման հնարավոր վերանայմանը Ֆոլկլենդյան (Մալվինյան) կղզիների հարցում։ Ներկայում Վաշինգտոնը ճանաչում է Մեծ Բրիտանիայի վերահսկողությունը այդ տարածքների նկատմամբ, սակայն դրանց նկատմամբ հավակնություն ունի Արգենտինան։

Բացի այդ, քննարկվում է նաև ՆԱՏՕ-ի շրջանակում որոշ երկրների ներկայացուցիչների նշանակումների վերանայումը կարևոր պաշտոններում։

Տվյալների համաձայն՝ այս առաջարկները պայմանավորված են այն հանգամանքով, որ մի շարք դաշնակիցներ չեն տրամադրել իրենց տարածքները ԱՄՆ ռազմական գործողությունների համար։

Գործակալությունը նշում է, որ պարզ չէ՝ նման քայլերի իրականացումը որքանով է հնարավոր իրավական և ինստիտուցիոնալ տեսանկյունից։

Ներկայացված զարգացումները ցույց են տալիս, որ դաշինքի ներսում քննարկվում են փոխադարձ պարտավորությունների և համագործակցության ձևաչափերի վերանայման տարբերակներ։