ISDA ապրանքանիշի պաշտպանությունը տարածվել է Հայաստանի տարածքի վրա. ԿԲ

ISDA ապրանքանիշի պաշտպանության տարածումը նպաստում է նաև ֆինանսական շուկայի զարգացմանն ու միջազգային ինտեգրմանը։

Մտավոր սեփականության համաշխարհային կազմակերպության (WIPO) 2025 թվականի նոյեմբերի 13-ի որոշմամբ՝ ISDA ապրանքանիշի պաշտպանությունը տարածվել է Հայաստանի Հանրապետության տարածքի վրա։ Այս մասին հայտնում են ՀՀ կենտրոնական բանկից։

Կարգավորումը ապահովում է իրավական հստակություն ISDA անվան տակ հրապարակվող ձևաթղթերի, սահմանումների, ուղեցույցների և կրթական նյութերի կիրառման հարցում՝ կանխելով դրանց չարտոնված օգտագործումը հայկական շուկայում։ Սա կարևոր է այն պայմաններում, երբ ֆինանսական շուկայի մասնակիցները գործնականում կիրառում են միջազգային ստանդարտների վրա հիմնված պայմանագրային լուծումներ։

ISDA ապրանքանիշի պաշտպանության տարածումը նպաստում է նաև ֆինանսական շուկայի զարգացմանն ու միջազգային ինտեգրմանը։ ASDA ստանդարտ պայմանագրի կիրառությունը ուղղված է ածանցյալ գործիքների, ռեպո և արժեթղթերի ֆինանսավորման գործարքների զարգացմանը՝ նվազեցնելով իրավական ռիսկերը և բարձրացնելով շուկայի մասնակիցների միջև վստահությունը։

Կարգավորման արդյունքում ձևավորվում է ավելի կանխատեսելի և թափանցիկ գործառնական միջավայր, որը միաժամանակ նպաստում է միջազգային գործընկերների ներգրավմանը և համաշխարհային պրակտիկային համապատասխան ռիսկերի կառավարման մշակույթի տարածմանը Հայաստանում։