Իրանի զինված ուժերը թույլ չեն տա տարածաշրջանից նույնիսկ մի կաթիլ նավթ արտահանել․ ԻՀՊԿ

Տարածաշրջանի ելքը որոշում են Իրանի ուժերը, այլ ոչ թե ամերիկացիները:

Իրանի Իսլամական հեղափոխության պահապանների կորպուսի (ԻՀՊԿ) ներկայացուցիչ Սարդար Նայինին հայտարարել է, որ Իրանի զինված ուժերը թույլ չեն տա տարածաշրջանից նավթի արտահանում մինչև հետագա կարգադրության ստացումը՝ անկախ ԱՄՆ-ի և նրա դաշնակիցների ճնշումներից։ Այս մասին հայտնում է Tasnim գործակալությունը։

«Պատերազմի ընթացքի և դրա ավարտի վերահսկողությունն այժմ Իրանի ձեռքում է։ Տարածաշրջանի ելքը որոշում են Իրանի ուժերը, այլ ոչ թե ամերիկացիները»,- նշել է Նայինին։

Նա նաև անդրադարձել է ԱՄՆ նախագահ Դոնալդ Թրամփի հայտարարություններին՝ նշելով, որ Իրանի զինված ուժերի հզորության վերաբերյալ պնդումները չեն համապատասխանում իրականությանը։

ԻՀՊԿ ներկայացուցչի խոսքով՝ ամերիկյան նավերը տարածաշրջանում պահպանել են զգալի հեռավորություն՝ անվտանգության նկատառումներով։ Նա նաև պնդել է, որ իրանական հրթիռային համակարգերը հզորացվել են, իսկ հակառակորդի զինամթերքի պաշարները մոտենում են սպառման։

Նաինին հայտարարել է նաև, որ ԱՄՆ-ի կողմից նավթի գների սահմանափակման փորձերը, ըստ իր գնահատականի, ժամանակավոր և անարդյունավետ են։

Հայտարարությունները հնչել են տարածաշրջանում լարվածության սրման և համաշխարհային էներգետիկ շուկաներում անկայունության ֆոնին։