Իրանը նախազգուշացնում է՝ Խարկ կղզու վրա հնարավոր հարձակումը կազդի նավթի համաշխարհային գների վրա

Խարկ կղզին Իրանի նավթային արտահանման հիմնական հենակետերից է:

Իրանի խոշորագույն նավթային տերմինալի՝ Խարկ կղզու վրա ԱՄՆ-ի հնարավոր հարձակումը զգալի ազդեցություն կունենա նավթի համաշխարհային գների վրա։ Այս մասին հայտարարել է Իրանի Իսլամական հեղափոխության պահապանների կորպուսի ռազմածովային ուժերի հրամանատար Ալիռեզա Թանգսիրին, հաղորդում է ՌԻԱ Նովոստին։

«Եթե Հորմուզի նեղուցի նկատմամբ խելացի վերահսկողությունը ձեզ բերեց նավթի գների նոր ինդեքսներ, ապա հարձակումը Խարկ կղզու վրա ձեզ կտա աշխարհում էներգիայի բաշխման և գների ավելի ծանր ու նոր հավասարում»,- գրել է Թանգսիրին X սոցիալական ցանցում։

Նշվում է, որ Խարկ կղզին Իրանի նավթային արտահանման հիմնական հենակետերից է և կարևոր դեր ունի համաշխարհային էներգետիկ շուկաներում։

Ավելի վաղ Axios պորտալը, հղում անելով աղբյուրներին, հայտնել էր, որ ԱՄՆ նախագահ Դոնալդ Թրամփը դիտարկում է իրանական Խարկ կղզին գրավելու հնարավորությունը։