Իրանի Կենտրոնական բանկի ղեկավարը հրաժարական է տվել՝ արժութային ճնշումների ֆոնին

Արժույթի արժեզրկումը հանգեցրել է գնաճային ճնշման ուժեղացմանը։

Իրանի Կենտրոնական բանկի ղեկավար Մոհամմադ Ֆարզին հրաժարական է տվել։ Տեղեկությունը հայտնել է երկրի նախագահի աշխատակազմը՝ euronews-ի փոխանցմամբ։

Հրաժարականը հաջորդել է երկրում արձանագրված արժութային կտրուկ տատանումներին։ Իրանական ռիալը ԱՄՆ դոլարի նկատմամբ հասել է պատմական ցածր մակարդակի՝ գերազանցելով 1.4 միլիոն ռիալը մեկ դոլարի դիմաց, ինչի ֆոնին երկուշաբթի օրը սկսվել են վերջին երեք տարվա ընթացքում ամենախոշոր բողոքի ցույցերը։

Լրատվամիջոցների տվյալներով՝ բողոքի ակցիաների հիմնական օջախը Թեհրանի Մեծ շուկային հարակից տարածքներն էին, որտեղ առևտրականները զանգվածաբար փակել էին իրենց խանութները։ Նման գործողություններ արձանագրվել են նաև այլ խոշոր քաղաքներում, այդ թվում՝ Սպահանում, Շիրազում և Մաշհադում։

Արժույթի արժեզրկումը հանգեցրել է գնաճային ճնշման ուժեղացմանը։ Իրանի պետական վիճակագրական կենտրոնի տվյալներով՝ դեկտեմբերին տարեկան գնաճը հասել է 42.2 տոկոսի։ Նույն ժամանակահատվածում սննդամթերքի գները աճել են 72 տոկոսով, իսկ դեղորայքի և բժշկական պարագաների գները՝ 50 տոկոսով՝ նախորդ 12 ամիսների համեմատ։

Տնտեսական ցուցանիշների փոփոխությունը ազդեցություն է ունեցել ներքին շուկայի կայունության և սպառողական ծախսերի վրա։