Ամփոփվեց «Ինեկոբանկը քո կողքին» նախաձեռնության կրթության աջակցության ծրագիրը

Հայաստանի 14 համալսարաններից, տարբեր ֆակուլտետներ ու մասնագիտական ուղղվածություններ ներկայացնող ուսանողներից կազմված 11 թիմ իրենց նորարարական նախագծերը ներկայացրին «Ինեկոբանկը քո կողքին» կորպորատիվ սոցիալական պատասխանատվության նախաձեռնության կրթության աջակցության ծրագրի եզրափակիչ փուլում:

Արդեն երրորդ տարին իրականացվող «Ինեկոբանկը քո կողքին» ծրագիրը,  որին միացել են հայաստանյան 14 համալսարաններ, չորս ամսվա ընթացքում ունեցել է 4012 դիմորդ, ինչը մի քանի անգամ գերազանցում է նախորդ տարիների ցուցանիշները։ 

4012-ից եզրափակիչ էր անցել 205 մասնակից, նրանցից 150-ը ստացել էին կրթաթոշակ, իսկ 55-ը ներգրավվել 11 թիմերում՝ պայքարելու ուսման վարձի ամբողջական փոխհատուցման և արտերկրում կարճաժամկետ կրթական ծրագրում հաղթելու հնարավորության համար։  

Ի սկզբանե, ծրագրի առաջին բաղադրիչով նախատեսված էր կրթաթոշակ տրամադրել  150 ուսանողի։ Սակայն Ինեկոբանկը, բարձր գնահատելով բոլոր ուսանողների աշխատանքը, նվիրումն այս ծրագրին և կրթությանը, եզրափակիչ փուլում հաղթող չճանաչված 20 մասնակիցերին ևս անակնկալ կերպով հանձնեց կրթաթոշակներ՝ որպես բանկի գնահատանքի նշան` ուսանողների ջանքերի ու տաղանդի։ Արդյունքում՝ եզրափակիչ փուլ անցած բոլոր 205 մասնակիցները դարձան հաղթող։ 

11 թիմերը վերջին շաբաթներին աշխատել են Ինեկոբանկի 11 մենթորների հետ, ովքեր իրենց գիտելիքներով ու փորձով ուղղորդել են մասնակիցներին՝ մշակելու և առաջ մղելու նորարարական գաղափարները, մեծապես նպաստելով ուսանողների մասնագիտական աճին ու զարգացմանը։ 

«Շատ տպավորված եմ ներկայացված նախագծերով։ Թիմային աշխատանքի հետ կապված կարծրատիպեր կան, և ուսանողներն այսօր կոտրեցին դրանք իրենց նախագծերով, պատրաստավածության աստիճանով ու ներկայացման մակարդակով։ Նրանք ապացուցեցին, որ հնարավոր է չճանաչել միմյանց,, սովորել տարբեր բուհերում, ունենալ տարբեր մասնագիտություններ՝ սկսած դերասանից մինչև նկարիչ, իրավաբան, միջազգային հարաբերությունների մասնագետ կամ վերլուծաբան, և կարողանալ աշխատել մեկ գաղափարի շուրջ, հասնել կոնկրետ  նպատակի ու հաղթել»,-նշում է Ինեկոբանկի Գործադիր տնօրեն Հայկ Ոսկանյանը։ 

Մենթորների առաջնորդությամբ թիմերը մշակել և ներկայացրել են կրթության, համայնքային զարգացման, կայունության և թվային նորարարության ուղղություններով գաղափարներ։ 

Ինեկոբանկի Տաղանդների ներգրավման և վերապատրաստման ծառայության ղեկավար Հեղինե Միքայելյանը նշում է. «Ապագան՝ ավելի մեծ հնարավորություններով» գաղափարախոսությունը, որը մենք որդեգրել ենք այս ծրագրի շրջանակում, այսօր առավել արդիական է։ Մեր երկրի զարգացման համար մեզ անհրաժեշտ են նոր մտածողությամբ, կրթությամբ և ստեղծարար մոտեցմամբ երիտասարդներ, ովքեր կկառուցեն կայուն և մրցունակ հասարակություն։ Որպես ծրագրի մենթորներից մեկը՝ ես շատ հպարտ եմ մեր երիտասարդներով։ Նրանք խելացի են, նախաձեռնող, նպատակասլաց ու հետաքրքրասեր։ Վերջին ամիսներին ավելի սերտորեն շփվելով նրանց հետ՝ ավելի եմ համոզվել, որ մեր ապագան վստահելի ձեռքերում է»։ 

Նախագծերը գնահատող ժյուրիի կազմում էին Ինեկոբանկի, գործընկեր համալսարանների ներկայացուցիչները, ինչպես նաև հանդիսատեսը։ Հաղթող ճանաչվեց 7 թիմ, ընդհանուր 35 ուսանող. երեք թիմ արժանացավ ուսման վարձի ամբողջական փոխհատուցման, իսկ չորս թիմ՝ արտերկրում կարճաժամկետ կրթական ծրագրերում մասնակցելու հնարավորության։ 

Միջոցառման ընթացքում հայտարարվեց նաև «Ինեկոբանկը քո կողքին. ապագան ավելի մեծ հնարավորություններով» նախաձեռնության ամենամեծ բաղադրիչի՝ «30 Master» ծրագրի մեկնարկը։ Ծրագրի շրջանակում հայաստանաբնակ 30 մասնագետից յուրաքանչյուրին կտրամադրվի  մինչև 40.000.000 մլն ՀՀ դրամ՝ մագիստրոսական կրթության ֆինանսավորման համար աշխարհի թոփ 5 բուհերում, ինչպես նաև Shanghai Rankings-ի և QS Rankings-ի չափորոշիչների համապատասխան թոփ 50-ից 500 միջազգային համալսարաններում ուսանելու նպատակով՝ ըստ Բանկի կողմից առանձնացված մասնագիտացումների։ 

Ծրագրի դիմումները բաց են 2025 թ. նոյեմբերից մինչև 2026 թ. նոյեմբեր։ 

«Ինեկոբանկը քո կողքին» նախաձեռնության մասին

Կարևորելով  շարունակական կրթությունը, գիտելիքահեն, տեխնոլոգիաների վրա հիմնված, մրցունակ մասնագետներով հասարակության ձևավորումը՝ սույն թվականի հունիս ամսին Ինեկոբանկը հայտարարեց իր կորպորատիվ սոցիալական պատասխանատվության (ԿՍՊ) հայեցակարգի շրջանակում իրականացվող կրթության աջակցության ծրագրի ընդլայնման մասին։

«Ինեկոբանկը քո կողքին. Ապագան ավելի մեծ հնարավորություներով» ԿՍՊ նախաձեռնությունը 2023 թվականին ներդրվել և մեկնարկել է կրթության ֆինանսավորման ծրագրերով՝  հետագայում ընդգրկելու իրականացվող առավել բազմազան ուղղություններ։ Այս տարի այն արդեն իսկ ավելի ընդգրկուն է: Ծրագրի ընդհանուր բյուջեն ավելի քան 1 միլիարդ ՀՀ դրամ է։ «Ինեկոբանկը քո կողքին» ԿՍՊ հայեցակարգի նոր ռազմավարական բաղադրիչներից է նաև Ինեկոբանկի աշխատակիցների երեխաների ֆինանսավորումը, ովքեր սովորում են բակալավրի ու մագիստրատուրայի ամենատարբեր ծրագրերում։ Ծրագրի շրջանակում հասցրել են ֆինանսավորվել 7 աշխատակիցների երեխաներ։

2025-ին «Ինեկոբանկը քո կողքին» ծրագրի բաղադրիչներն են՝ 

-170 կրթաթոշակ

-15 ուսանողի՝ ուսման վարձի ամբողջական փոխհատուցում

-20 ուսանողի՝ կարճաժամկետ կրթական ծրագրերում մասնակցության հնարավորություն արտերկրում

-30 մասնագետի մագիստրոսական կրթության ֆինանսավորում աշխարհի թոփ 50 բուհերում

Մանրամասները՝ տեսանյութում․