Հնդկաստանում ՀՀ դեսպանությունը գործում է արտակարգ ռեժիմով

Դեսպանությունը բոլորի հետ գտնվում է ամենօրյա կապի մեջ։

Վերջին օրերին Հնդկաստանում ՀՀ դեսպանությունը (համատեղության կարգով նաև՝ Շրի Լանկա, Բանգլադեշ և Նեպալ) իր գործառույթներն իրականացրել է արտակարգ ռեժիմով։ Այս մասին հայտնել է ԱԳՆ մամուլի խոսնակ Անի Բադալյանը։

Նրա խոսքով՝ չվերթների չեղարկման հետևանքով հավատարմագրման երկրներում մնացած՝ հիմնականում զբոսաշրջային նպատակներով Հնդկաստանում և Շրի Լանկայում գտնվող ՀՀ քաղաքացիների հետ պահպանվել է կապ, հավաքագրվել են անհրաժեշտ տեղեկություններ և դիտարկվել նրանց՝ ՀՀ վերադարձի հնարավորությունները։

Դեսպանությունը հետևողական աշխատանք է իրականացրել համապատասխան թռիչքի թույլտվություն ստանալու ուղղությամբ՝ Հնդկաստանի ավիացիայի նախարարության և ԱԳՆ-ի հետ փոխգործակցությամբ։

Մարտի 5-ի ուշ երեկոյան Հնդկաստանում անցկացված Seaside Startup Summit-ի մասնակիցներն ու «Vardan Travel» զբոսաշրջային խմբի անդամները՝ ընդհանուր 104 ՀՀ քաղաքացի, Գոայից մեկնել են Երևան։ Ինքնաթիռն արդեն վայրէջք է կատարել «Զվարթնոց» օդանավակայանում։

Կապ հաստատած քաղաքացիներ

Այս պահին ՀՀ դեսպանության հետ կապ է հաստատել՝

  • Շրի Լանկայից՝ 12 ՀՀ քաղաքացի,

  • Գոայից՝ 6 քաղաքացի,

  • Մալդիվներից՝ 2 քաղաքացի։

Դեսպանությունը բոլորի հետ գտնվում է ամենօրյա կապի մեջ։ Հրատապ մեկնելու ցանկության դեպքում քաղաքացիներին առաջարկվել է դիտարկել տարբեր գործող ուղղություններ։

Հնդկաստանում ՀՀ դեսպանության հետ կապի համար նշված է հետևյալ հեռախոսահամարը՝ +32 493 88 00 88 (նաև WhatsApp)։